【第二人生】退休後做臨時演員 69歲Paul Dantz：繼續工作唔一定係為錢，我想累積更多人生經歷
69歲的Paul Dantz係一名電視劇同埋電影臨時演員，機緣巧合下響2019年，亦即係退休後一年加入依個行業，而且一做就愛上，仲參演過《怪獸與鄧不利多的秘密》同《天才少女福爾摩斯》！佢認為退休後再就業唔一定因為錢，仲有好多原因令佢決定繼續做臨演。
Paul響2018年退休，當時佢就覺得自己需要一個人生目標，唔能夠日日都浪費時間響瞓覺同睇電視上面，佢認為一定要搵野做keep住忙碌，所以退休後仍然幫手家庭生意，亦都繼續玩音樂。
酒吧睇波成為做臨演契機
去到2019年，Paul同朋友去酒吧睇波，睇睇下同隔離枱客人傾開偈，對方以前係做演員替身，一見到Paul就覺得佢個樣好有演員面相，仲畀咗一堆仲介公司資料鼓勵Paul去應徵。Paul抱住一試無妨的心態，向其中一間臨時演員公司寄出履歷，幾個月之後竟然真係有回音，就係咁Paul開始踏上做臨時演員的道路。
Paul響唔同電視劇、電影都做過臨演，而數最多人認識的電影非《怪獸與鄧不利多的秘密》莫屬，Paul參與的一幕係眾人響宴會上發生爭執，個個人都拎住一枝木棒仔 (亦即係魔杖) 揮來揮去，由於現場拍攝時未加後製特效，Paul話場面十分逗趣。
臨演回憶如數家珍
雖然得到演出機會，但畢竟一部電影要將漫長的拍攝過程濃縮做兩三個鐘，所以Paul每次都唔知自己最後會唔會響電影裡出現。不過其實佢都唔係好在意，因為比起有無出現響電影裡面，佢更加享受拍攝當下，認為享受咗美好的一日已經好足夠。
「我去過哈里波特片場拍攝；得過奧斯卡奬項的化妝師幫我化妝；可以拎住假槍同其他臨時演員互射，又試過由電單車飛落地。當然唔少得遇到好多好出色的人，仲有機會企響Eddie Redmayne (《怪獸與鄧不利多的秘密》男主角) 隔離同佢講早晨。」Paul如數家珍咁數算佢做臨時演員以來的珍貴回憶，仲話有糧出只不過係bonus。不過依份「bonus」都相當唔錯，一般每日人工係英磅 £125至 £130，OT另計，Paul知道有些臨時演員一年可以賺8至9萬英磅。
片場大忌：望住鏡頭？
Paul話做臨演必須有耐性，好多時都要一大早起身，到片場後要等好耐、企好耐先正式開始拍攝，對69歲的他來說體力上有時都幾吃力，不過佢話都應付到，唔算係艱難的工作。但係Paul就話有些片場禁忌一定要避免，例如走位時千祈唔可以擋到鏡頭、切忌望住鏡頭，同埋禁止追星同偷拍，Paul就曾經見過有臨演因為以上原因而被辭退。
Paul深感自己好幸運，好多人退休後只係做超市店員，為顧客指引下商品位置，雖然職業無分貴賤，但Paul認為自己唔適合做依類刻板的工作。今年先69歲的他，明言要保持腦筋活躍，繼續工作唔一定係因為錢，而係持續累積更多人生經歷。