做到天文台台長純粹好彩?林超英退休13年:歲數大了,最緊要睇得低自己但不自卑

唔少人退休後,突然響工作崗位退下來會頓感失落,甚至覺得失去自我價值。曾任天文台台長的林超英,貴為政府部門首長,管理幾百個員工,退休後的他係點樣面對同適應轉變呢?

林超英退休-展覽作品

退休後頭一年身體不適應

林超英退休至今已經13年,回想起第一日唔使再返工,他笑說:「大家都話退休後去行公園,於是我都去了公園散步。」途中遇上清潔工跟他打招呼,恭喜他退休真好,林超英頓時不懂反應,講唔出退休係好定唔好,因為行行下,他其實覺得有點無所事事,還好他的最大興趣就係觀鳥,總算可以打發一下時間。

他坦言雖然退休前做足準備,但退休後頭一年身體相當唔適應,「身體習慣咗每日做好多繁重工作,會分泌一堆物質給我用,例如腎上腺素,但退休後用唔著這些物質,過剩的分泌物令到身體唔平衡。身體所有本來保護你的事,退休那日起變成傷害你,所以好多退休人士初初都會有唔安樂的感覺。」

林超英認為自己比人幸運,因為他醒覺到身體的不平衡,明白它的成因,可以找方法應對。退休後他忙著四出演講、同各個機構合作,加上身兼秘書角色,令自己保持一定程度的忙碌,減低唔平衡的感覺。

林超英退休-參與鳥書會議
鍾意觀鳥的林超英,退休後參與鳥書會議。

做台長「9 成 9 係好彩」

退休後失去工作上的成就和在辦公室的威嚴,或許有些人會感到失落,不過林超英卻十分豁達,笑言退休前後都係差唔多,「做台長時都係自己一個出去開會,習慣咗唔會有一堆人跟住,退休後自己行出街都係一樣。」

提到登上天文台台長之位,他謙虛地說:「9 成 9 係好彩。」前任台長林鴻鋆只比他年長一歲多,照理來說兩人差唔多時間退休,林超英自知本身無機會做台長。但係世事往往叫人意想不到,響接近退休年齡時正好遇上政府改制,讓公務員選擇延遲退休,而剛好林鴻鋆希望如期退休,這讓林超英有機會當上 6 年天文台台長。他續說:「其實我以前去咗外國讀PhD,但讀咗兩星期就返香港,如果繼續讀落去,遲多兩年先入職,都唔輪到我做台長。」一切似乎冥冥之中自有安排。

退休後最緊要睇得低自己

雖然登上事業高峰,但林超英並未意氣風發,反而睇得透通,「做高官睇落威風,但威風係來自職位,並唔係自己本身。」他建議大家退休後必須調整心態,要學識「睇得低」自己,可以減低退休後與在職時嘅落差,「有些人退休後會難過,很大原因係因為仍然維持少年時期『睇得起自己』的心態,而忘了歲數大了,要學識睇得低自己。」有朋友對他說退休後的時間一文不值,他回答:「我以前的時間都係一文不值,我作為一個人都係一文不值,只係我的職位值錢,唔係我本身。」

林超英退休-藝術館模仿

林超英的豁達源自多年來的觀鳥體悟,對他來說,脫下衣服後,人和鳥其實一樣,大家都有眼耳口鼻,同樣要進食、呼吸、排泄,為了延續而繁殖,人類不過是所有動物裡的其中一種,但人卻以「萬物之靈」自居,「結果人人返工返得咁辛苦,仲要擔心退休,真係有點滑稽,反觀其他動物多自在,一樣可以繁衍到現在。」他說。

不過他也深明一日還在這個體制下生存,就要接受現實搵方法應對。觀鳥的經歷令他學會睇低自己但不自卑,「知自己渺小,無論發生咩事都唔太重要,就自然少煩惱,生活好易過。」

正因為依份放得開、睇得低,令他在退休前後的過渡期並無出現太大落差,「離開台長位置無問題,只不過係角色轉換,唔好太執著表面風光,一切都係虛榮。」他又說:「退休後其他人睇唔睇得起你,就係人的問題,唔係職位的問題。」

事實證明,即使卸下天文台台長身份,林超英在大眾心目中仍然相當有份量,退休已經13年仍不時接到媒體、NGO邀約。林超英指,退休人士與其他人唔同的地方,就係累積了好多經驗,應該多多向外延伸同人接觸,睇睇點樣運用這些人生經驗。不過閱歷豐富唔等同恃老賣老,要保持開放態度,了解世界點轉變,接受新事物,「將個心打開,先會開心。」

日後最想回歸自然循環裡

興趣多多的他 4 年前愛上 #路邊花草 ,他自己都無諗過 70 歲仲會有新興趣,一開始只不過係覺得好多事都唔識就去學,後來慢慢發掘到賞花的樂趣,每日都有新發現,覺得好玩就響Facebook分享發現同知識,更曾經主持電台節目專講行山賞花。退休後不停嘗試新事物、不斷地為社會不同持分者作無私的分享,問他可有一刻諗過咩都唔做靜靜享受生活?他答到:「我好好彩,無諗過有機會讀大學、去外國進修、做天文台台長,依一切都係香港給我的機會,所以只要做得到,我都好想回饋出去。」

從氣象到觀鳥到賞花,凡係同大自然相關的他都感興趣,林超英著緊人類和地球的可持續發展,盡自己力量保護地球,從不開冷氣少製造垃圾。談到百年歸老的殯葬方式,林超英第一句就說:「唔想火化,嘥火力兼製造二氧化碳。」他心中目中的理想殯葬方式相當「原始」:脫光衣服,身上綁一顆大石,扔出公海長埋海底,「自然腐化又好、被魚吃掉又好,希望可以回歸自然循環裡。」說完後他笑說:「現實都無乜可能。」

林超英的話語裡常常展現出豁達開朗,卻又同時包含對現實的妥協,在限制裡盡可能活出獨特的人生步調,令退休生活過得更快樂自在。

(相片由受訪者提供)

相關閱讀:林超英 退休13年樂活人生:退休前5年積極擴闊社交,維持至少3樣興趣