與太太同行半世紀 林超英的婚姻秘訣:退休後要適當地失蹤 見到任何人都讚太太好
「我太太真係對我好好!」依句可能係林超英響訪談過程中講得最多的一句說話,他對太太讚不絕口,稱讚太太持家有道、退休後發展個人專業,仲照顧得老公好好,甚至幫佢搵埋私人健身教練!
林超英與太太蘇曼雲相識約大學,同行半世紀仍然恩愛如昔,到底有咩婚姻秘訣呢?
依個伴無人代替到
講到婚姻關係對退休生活的重要性,林超英馬上回答:「退休生活最重要的事,就係老婆對你好!」林超英感恩遇上太太,多年來二人同步一齊學習成長,就連響「唔開冷氣」依件事上面,太太學習中醫後,亦因為健康關係而認同他的做法。如今二人都年過70歲,仍然彼此扶持,林超英說:「去到依個歲數,手腳頭腦都變慢了,以前唔會做錯的事而家都會錯,好在兩公婆互相幫忙,依個伴響生活各個細微的地方對你好重要,無人代替到。」
林超英提到太太蘇曼雲時十分風趣,更稱自己好好彩,因為太太到今時今日仲肯睬佢,又話自己「絕對尊重老婆」。雖然語帶幽默,但都掩蓋不了他對太太的自豪,「佢退休後生活安排得好好,身體亦顧得好好,持家有道,養到我依個『大仔』幾好睇,佢都幾成功。」
退休後要適當地失蹤
二人退休後各自安排活動,林超英忙著四出演講、發展唔同項目、觀鳥賞花;太太蘇曼雲除了去做義工之餘,退休初期更去修讀中醫,學習新的專業技能。林超英坦言二人退休後相處時間唔算好多,大家各有各忙,但他認為這樣反而係好事,由朝對到晚太辛苦。他建議各位男士退休後要為太太留私人空間,「唔好成日留響屋企,要適當地失蹤。」因為對太太來說,退休後要日對夜對可能係一大衝擊,亦侵害到她的私人時光。「退休後重疊的時間可以多,但唔可以太長,否則容易出問題。」他說。
林超英指自己與太太一直給予對方很多空間,大家有自己的社交圈子、工作生活,亦都彼此信任,鼓勵對方追求理想,就好似太太退休後到內地兩三個月讀中醫,他都大力支持。
台長都要掃地?
他提到唔少人退休後會有婚姻危機,在日本甚至好多夫妻響老公退休後離婚,他提醒男士避免將職場那一套帶返屋企,退休後多幫忙分擔家務,學一點家居小修理,「唔好做屋企寄生蟲,對家務指指點點,你要出聲就自己做咗去。」
曾經有人問他:「台長都要掃地?」他答到:「台長都係人,點解唔使掃地?」他退休後唔單止多多分擔家務,仲備齊各式修理工具,所有家居小修小補都自己來,最近仲上網自學更換沖水馬桶的零件。直言太太叫到的事都會幫忙做,「做得好唔好另計,但肯做已經加分,老婆覺得你有啲用。」外人眼中他是前天文台台長、社會頂尖菁英,但返到屋企,他也不過是一位丈夫、爸爸,「別讓外面的世俗地位搞到自己好似個廢人,千祈唔好坐響屋企好似大爺咁,死梗!你要知道,佢 (太太) 生活可以無你,但你的生活唔可以無佢。」說完後他哈哈大笑起來。
見到任何人都要讚太太好
他仲寄語各位退休人夫,就係要尊重同讚美太太。他笑言「由朝到晚讚佢,出到去更加要響其他人面前讚佢!」他的讚美心得是這樣:「當面讚佢佢可能會覺得我口甜舌滑,所以我有個習慣,見到所有人都會讚我老婆好,再拜託對方遇到我太太時記得同佢講我讚過佢。」這個令夫妻和睦嘅小秘訣,大家有冇收到?
他最後引用了哲學大師唐君毅的話語:「尊重對方的獨立人格」,「依一句概括所有,太太唔係你的一部份,當然同你有唔同,會鬧交係正常。」對他來說,所有爭吵都係小事,兩公婆互窒反而增添樂趣,「對方仲肯嘥力鬧你,你被鬧都應該高興啦。」