50+先去做model？素人模特兒Deon：人生有無限可能，唔好被年齡限制自己
充滿活力的Deon，現時係自僱人士，除了正職工作之餘仲興趣多多，當model、做青少年綜合服務、跑馬拉松……興趣多到數唔清，她常常說：「唔好被年齡限制自己，即使依個年紀，仲有好多嘢可以試。」睇落相當年青的她，到底真實年齡係幾多歲呢？文末揭曉！
不如試下應徵model？
Deon而家係50+模特兒中介公司「老正工作室」旗下的模特兒，本身係素人的她點解會突然跑去應徵模特兒呢？一切要由2018年講起。當時Deon正為機構籌備二手時裝店，負責宣傳和推廣的她絞盡腦汁想令衣服睇落更加吸引，但有感沒有model著起衣服，只係將衣服掛起影相始終無咁好睇，於是萌起了搵model影相、拍片的念頭，但由於時間緊迫，要搵到適合人選亦唔容易，身高1米7的Deon忽發奇想：「不如試下自己做model？」
就這樣，她將二手衫著上身，第一次以模特兒身份拍下照片。本來只係想吸引更多人購買二手衫，沒想到照片曝光後，好多朋友都對她說：「你唔做model嘥曬！」就連做服裝品牌代理的朋友都大讚「好得」。得到行內人肯定，Deon蠢蠢欲動，她心想：「不如試下應徵model？睇睇係朋友客氣，定係自己真係有潛質？」
Deon不諱言自己有個「model夢」，身材高䠷的她自細就被話似model，最鍾意睇雜誌扮模特兒擺pose，喜歡影相亦享受被拍。18歲那年睇到雜誌《姊妹》同《青春》上徵模特兒的廣告，於是膽粗粗跑去面試，結果一考便考上，不過後來發現原來模特兒行業相當複雜，思考過後還是作罷。
雖然後生時放棄入行，但她的model夢一直都在，那次為二手衫活動拍攝得到肯定，令她重燃追夢的熱情。她記起幾年前認識的「老正工作室」，決定放膽一試。為了留下最佳印象增加取錄機會，她甚至自己準備了一輯相片展示誠意，個性爽朗的她面試時也直截了當地告訴對方：「我想試下自己能力，睇睇市場能否接納我。」最後皇天不負有心人，Deon成功加入老正工作室成為旗下模特兒。
曾經參與舞台劇公演
除了當模特兒外，Deon都做過舞台劇，仲曾經以第二女主角身份參與過四場公演，而這個機會亦係由做義工開始。Deon當時幫一套舞台劇做場務義工，向來鍾意表演的她某日見到團隊招募幕前演員，於是又跑去試試，獲選上做「茄喱啡」的角色。
至於點解會由茄喱啡變成第二女主角？Deon話自己貪玩，參與排練時會順道記下其他角色的台詞，所以每當有演員缺席排練時，工作人員都會找她幫手「頂位」，加上她沒有包袱演得比較放，「頂下頂下就做咗第二女主角」。雖然她十分享受舞台，鍾意在台上表演時得到回響和認同，但因為舞台劇需要花好多時間排練，仍然要兼顧正職的她只好暫且放下。
為滿足感挑戰半馬
興趣多多的她最近積極備戰馬拉松，已經跟教練練跑一年半，目標係今年內挑戰半馬。Deon指自己6年前已經開始跑步，後來認識了一些跑步的朋友，先發現自己的跑步姿勢並唔正確，於是找教練調整。會挑戰半馬純粹係因為「覺得自己做得到」，所以去驗證自己係咪真係做得到。
Deon深信年齡並唔係障礙，無論幾歲都仍然有無限可能，「我哋潛藏住好多嘢，要自己尋找同實踐，確認嗰樣嘢係屬於自己。依個過程會有滿足感，同埋祝福到其他人，就好似跑步咁，朋友見我跑又一齊跑。」
服務青少年 生命影響生命
除了發掘多樣興趣外，Deon同時以自己的能力回饋社會，投入青少年服務已達20年以上，問她同年青人相處有咩心得？她話自己無特別去緊貼潮流、搵共同話題，「同年青人做朋友最重要係有顆『謙卑的心』，唔好說教，多重視佢哋感受。我會關心佢哋想做個咩人，一齊搵佢叻嘅地方。」
生命影響生命，唔單止係她影響了年青人，年青人同時也激勵了她，「佢哋令我更有活力，講得出要做得到。就好似我同佢哋講咗跑半馬，我就要做到。」她亦常常對年青人說：「你知唔知人生好好玩？有排玩！我發掘緊自己好多野，我到依個年紀都覺得好好玩！」
「無一刻覺得自己老」
Deon常常坐言起行，想做就做，之前一直嚮往小島平靜生活的她，最近將念頭付諸實行搬入南丫島，過自己的理想生活，她說：「唔需要家財萬貫，等到退休先過想要的生活。錢幾多先為之夠？退休係咪肯定仲行得走得？點解要等退休先做？點解唔而家就做？」
Deon形容自己的體能似20幾歲的，體型同外貌似30幾歲，而真實年齡呢？53歲。
歲月在她身上彷彿不留痕跡，活了半世紀依舊活力滿滿，她說：「我無一刻覺得自己老，心理狀態似30頭。人生有無限可能性，要對自己有好奇心先好玩！睇下可以發掘到自己幾多嘢，寶箱入面有好多寶藏，但你拎嚟拎去都係面嗰層，可能下面有鑽石、紅寶石呢？」
(照片由老正工作室及受訪者提供)