57歲劉美君身型fit爆 前所未有地滿意體態 透露80歲媽媽腦部手術成功打贏一仗
今年57歲的劉美君 (Prudence)，雖然仲好後生，但已經榮升嫲嫲，而家同仔女、孫仔孫女同埋媽媽響加拿大生活，勤練瑜珈同做運動的她身型fit爆。她日前在社交平台透露80歲的媽媽患上腦膜瘤，好在手術成功，現正休養康復中。
Prudence響社交平台上不時貼自己的運動照片，大多穿著運動Bra Top同短褲，可見她全身上下充滿結實肌肉，腹部平坦有腹肌之餘仲有馬甲線，Prudence指自己每日都會健身，認為自己的身材從來無好似而家咁fit！雖然差不多60歲，但相信Prudence的身形真係好過唔少後生女，她更指練好身體唔需要任何理由，睇來她十分之享受運動帶來的樂趣。
而早前響中秋節期間，Prudence就突然透露媽媽幾星期前發現患有腦膜瘤，腦內有一個好似高爾夫球咁大的瘤，因為唔知係良性定惡性，全家人都擔心到不得了。好在最後由頂尖神經外科醫生操刀開顱手術，媽媽終於平安無事，Prudence形容係打了漂亮的一仗，取得勝利。
經過今次事件，Prudence發現自己變得更加堅強，原來自己可以咁冷靜同鎮定，仲可以見血都唔暈低，幫媽媽洗傷口同沖涼。
中秋節當日係劉媽媽的80歲生日，同時亦係Prudence仔仔的生日，全家四代同堂一齊慶祝。Prudence表示好多謝各位的祝福，媽媽響屋企休養，響3名治療師同一名護士的幫助下復原得好好，食得瞓得，仲叫大家唔使擔心佢。見到媽媽無事，Prudence話終於可以鬆口氣，抖一抖！
