由藝人到精神科護士 52歲李綺虹大方回應素顏照：我唔係太有錢，唔會花好多錢扮靚
早前李綺虹素顏曝光之後，引起唔少討論，同樣身處加拿大的藝人李婉華，日前就邀請到李綺虹接受訪問大談近況！
今年52歲的李綺虹係1994年香港小姐季軍，隨後加入TVB做演員，因為甜美的外貌大受歡迎，後來響2004年結婚後返加拿大定居，鮮少在幕前出現，目前響加拿大任職精神科護士。
52歲李綺虹：我都懷疑係咪要積極Keep下自己？
李綺虹早前響社交平台分享素顏照，引起網友熱烈討論，有人認為她雀斑皺紋盡現，十分蒼老，但另邊廂則有網民大讚她勇於做自己，坦然面對老去。最近李綺虹接受李婉華的Youtube節目訪問，並再次以素顏示人，不過就戴上太陽眼鏡，大方回應素顏照所引起的討論，她直言因為陪囝囝踢波、踩單車返工，自己又懶得搽防曬，所以膚色愈來愈黑。
現時她居住在溫哥華較偏僻的地區，日常唔會太多打扮，她說：「我唔係太有錢，衫又唔係太靚，又唔會花好多錢去扮靚。」平日除了照顧家庭同返工外，她會打坐練習冥想，尋找內心平靜。
對於網民的批評，她說：「我平時唔化妝，我都懷疑係咪要積極Keep下自己。我有得解釋，因為我噚晚開夜班，瞓幾個鐘頭。」至於好多網友讚她真性情，她就話：「無辦法唔真，因為我唔叻做戲！」更加強調自己「唔係特登Show自然美，只係我真係好懶，有時我直接著睡衣出街，成日被我老公鬧。」
當精神科護士搵到滿足感
當年婚後返回加拿大，李綺虹坦言係因為年紀大，幕前工作逐漸減少，「總有好多比我後生、美麗、有才華嘅人出現，自然我就無咁多工作。」她在加拿大曾經四出搵工，連麵包店、油站的工作都應徵過，但就係無人請，於是響2013年修讀護士課程，畢業後任職精神科護士至今，她說：「我相信係天意，無人要之下，我就搵到精神科護士，我好鍾意自己嘅工作，鍾意幫到人，我鍾意聽人哋嘅故事。」
李綺虹曾經患上情緒病，搵過心理輔導員，然後慢慢調整自己，出外跑跑步，「當時經理人話有套戲搵我做，我都想返香港，因為有寄託就唔會匿響自卑漩渦裡面，之後食藥一段日子，然後返香港拍戲，有日突然覺得狀態改變了，開始慢慢好返。」
有過親身經歷，她更能夠切身處地明白病人，亦在工作上搵到滿足感，她更加同觀眾分享工作上的難忘故事：「頭一、兩星期做護士，遇到一位患癌無家者，佢講唔到嘢但好惡，幾得人驚，所以大家都唔敢靠近。有次夜晚半夜佢出廳，我見佢啲手曲住硬曬，於是話幫佢按摩，可惜幾星期之後佢就唔得喇！你哋一定會話綺虹好好，幫人按摩，但其實佢先係我天使，佢係我貴人，教我呢個新人點樣去同佢相處、點樣同唔講嘢嘅人溝通。」