67歲蘇施黃患大腸癌第三期 剛切除腫瘤即將化療 全靠食物保持心境開朗
近年積極拍Youtube影片的67歲的蘇施黃，個人頻道《教煮蘇 This is So good》多數分享飲食同玩樂資訊，但日前突然出了一條名為〈照腸結果出咗啦！〉的影片，自爆患上大腸癌第三期，並已完成手術準備化療。
響影片中見到蘇施黃正身處醫院，精神唔錯，她表示自己初初因為屙血而去睇醫生，響上個月26號入院檢查時發現患癌，隨即接受腫瘤切除手術，她說：「切割咗腸，大腸轉角位切咗15cm，嗰度有個腫瘤，側邊攞咗25粒淋巴，其中3個位有感染。」最後驗出係大腸癌第三期，手術後亦有再做詳細檢查，睇睇癌細胞有無走去身體其他地方，但幸好無擴散到。
蘇施黃指做完手術個人瘟瘟沌沌，不過都有精神，手術後第3日已主動要求唔再吊鹽水，改為正常進食，她說：「我好鍾意食嘢，拔曬啲尿喉鹽水喉進食，自己喺病房行嚟行去，行一陣發現間房太細，行出走廊，特登用手擺腰後面，挺直啲行，傷口因為微創，郁來郁去唔係好痛，感謝醫生同護士護理人員，另外要超讚醫院啲飲食。」
她更在影片中分享醫院的膳食，睇落相當豐富，向來鍾意美食的她表示全靠食物保持心境開朗，她說：「開心到不得了，一個人當你食嘢覺得自己病就好病，但當你覺得同Normal人一樣就Normal，我開咗刀，咁大個症，仍然笑口噬噬，面色非常之好，最緊要心境開朗，全靠食物。」
蘇施黃話之後會面臨大考驗，因為要做化療無啖好食，但她安慰自己化療完再食過，「我啲朋友話化療前先吃為敬，化療後再吃為敬。」祝蘇施黃化療成功，健健康康！
大腸癌係香港第二最常見的癌症，為及早搵出未有病徵的大腸癌患者或高危人士，政府衞生署資助50至75歲的香港到去私營機構接受大腸癌篩查，詳情按此。