【湯水食譜】冬季平補：黨參栗子蟲草花螺頭瘦肉湯 健脾補腎、增強免疫力
小小豬成日行幾步就好似冇氣冇力，唔多唔少同體質有關係，所以請教咗藥材店叔叔，佢就教我煲依個簡簡單單就可以做到平補，提氣健脾又有助提高機體免疫能力嘅黨參栗子蟲草花螺頭瘦肉湯。
(編按：平補多採用容易吸收、性味平和的食材及藥材，比起溫補同涼補，平補適合多數人的體質。)
材料：
黨參……… 一両
乾螺頭…… 6粒
蟲草花…… 一両
淮山……… 一両
栗子……… 半磅
陳皮……… 一角
蜜棗……… 3粒
瘦肉……… 約$45
做法：
1. 乾螺頭用清水放在雪櫃浸一晚。
2. 蟲草花浸軟身之後，擠乾水份。
3. 其他藥材浸洗一陣。
4. 栗子清洗乾淨。
5. 陳皮用水浸至軟身，然後刮囊。
6. 瘦肉洗淨汆水。
7. 煲內放約3L水，隨水加入陳皮。
8. 水滾後就可以加入所有材料。
9. 待滾起後，先用大火加蓋煲約15分鐘。
10. 之後轉慢火加蓋煲多1.5小時。
11. 最後加少少鹽調味就可以飲得啦。
可能乾螺頭喺度，所以就蓋過黨參味，啖湯其實同我平時煲嘅螺頭蟲草花冇乜太大分別，所以小小豬都快快口飲咗兩大碗添。
以下係各食材嘅功效，可以參考一下呀 (網上資料)：
黨參 – 補氣、提氣、養血、和胃，對中氣不足、身體虛弱受及脾胃虛好有幫助。
乾螺頭 – 有滋陰、補腎、補精、健脾、安神助眠功效。
蟲草花 – 含豐富蛋白質、滋肺、補腎、護肝、抗氧化、抗疲勞、提高機體免疫能力。
淮山 – 養陰、補脾、肺虛喘咳。
栗子 – 健有助健脾胃、增進食慾、改善腸道健康及增強扺抗力。
陳皮 – 理氣健脾、燥濕化痰。
蜜棗 – 補中益氣、化痰平喘。
溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！
文章獲 小小豬Kinsey 授權轉載