【湯水食譜】瑤柱南瓜粟米湯 護眼健脾養胃、增強免疫力 瑤柱代替豬肉更香甜
南瓜、粟米同埋紅蘿蔔一向都係好有營養豐富，既可增強免疫力，仲可以養胃健脾，但原來佢地都係對眼睛好好，咁就啱晒依家要護眼嘅小小豬，所以就快快手買齊材料，煲依個超甜嘅瑤柱南瓜粟米湯啦！
材料：
南瓜……… 半個
瑤柱……… 6粒
粟米……… 1條
紅蘿蔔…… 1條
蕃茄……… 3個
淮山……… 一両
茨實……… 一両
南北杏…… 一湯匙
蜜棗……… 2粒
杞子……… 半両
做法：
1. 乾瑤柱洗乾淨浸半小時，然後搣為絲。
2. 南瓜去瓤，然後切厚件。
3. 蕃茄洗淨切件。
4. 紅蘿蔔去皮切塊；粟米切件。
5. 其他材料浸洗一陣。
6. 煲內放約3L水，待水滾後加入所有材料。
7. 待滾起後，繼續用大火加蓋煲約15分鐘。
8. 之後轉慢火加蓋煲多1.5小時。
9. 最後加少少鹽調味，就可以飲得啦。
成個南瓜已經俾我煲融晒係湯入面，再加埋蕃茄同埋嘅瑤柱嘅香，個味真係好正，話晒咁快我地三口子就KO晒成煲湯，小小豬仲叫我過兩日再煲俾佢飲添！
以下係各食材嘅功效，可以參考一下呀 (網上資料)：
南瓜 – 有助增強免疫力、保護心血管及護眼，同時亦可以預防癌症及胃潰瘍。
瑤柱 – 有助降血壓、降膽固醇及補益健身。而且還具有抗癌、軟化血血管及預防動脈硬化等功效。
粟米 – 有增強體力、還能有效對抗眼睛老化及促進腦補發育。同時亦可去除體內濕熱之氣，仲可以利水、消腫。
紅蘿蔔 – 有促助減少眼睛疲勞與眼睛乾燥，同時亦有助清熱解毒、利濕、散瘀、健胃消食、化痰止咳、順氣、利便、生津止渴、補中安五臟等功能。
蕃茄 – 有提高人體免疫力、保護心腦血管、養陰生津、健脾養胃及降低疾病發生。
淮山 – 有健脾、補肺、固腎、益精等多種好處。
茨實 – 有補脾袪濕、益腎固精、滋養強身等作用。
南北杏 – 潤肺、止咳及平喘，亦可生津開胃。
杞子 – 有助養腎潤肺，也可補肝明目。
蜜棗- 止咳潤肺、化痰平喘功效。
溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！
文章獲 小小豬Kinsey 授權轉載