【素湯食譜】紅菜頭雜菜湯 豐富纖維促進腸道蠕動 排清體內毒素
話說新年入咗新界錦田拜年，就係咁就帶咗一個超級新鮮嘅紅菜頭返屋企，咁新鮮就當然唔好浪費，即刻買齊材料煲返個紅菜頭雜菜湯啦！
紅菜頭之前都煲過幾次，由老公唔鐘意飲到佢依家開始接受 (佢話紅卜卜好古怪哦)。今次我就加埋咗唔同嘅蔬菜一齊煲，就可以令雜菜湯含有豐富嘅纖維質和植物酵素，能幫助腸道蠕動，排清體內毒素和宿便，改善腸道健康。
依個時候飲都啱，因為新年時都應該大魚大肉咗好多餐，所以係時候排清體內毒素啦！
哈哈哈….個紅菜頭有幾新鮮？我係睇住農夫伯伯幫我揀，我仲親眼睇住佢拔出嚟呀。如果可以自己拔咁就仲正，因為仲有好多紅菜頭BB生長緊，為避興奮地誤踏爛，都係交俾農夫伯伯好啲。
不過即睇即拔都己經好興奮，我仲好好彩全場唯一一個大紅菜頭都落入我手啦….哈哈哈。
材料：
新鮮紅菜頭…… 1個 (如果平時係街市無大紅菜頭，可以用兩個小型代替)
番茄…………… 2個
蘋果…………… 2個
粟米…………… 1條
西芹…………… 1扎
薑……………… 幾片
做法：
1. 先將紅菜頭洗淨，然後去皮及切片。佢嘅莖葉都好有用，所以洗淨切段後加埋入去一齊煲呀。
2. 蘋果洗淨後切件；西芹洗淨切段。
3. 粟米及番茄洗淨後切件；薑片去皮之後拍鬆。
4. 煲內放約3L水，然後隨水加入薑片。我個人覺得加多幾片薑會更加好飲，不過因為要就小小豬關係，我只係加咗五小片。
5. 用大火將水煲滾後，將其餘材料加入煲內。
6. 待水再滾後用大火加蓋煲約15分鐘。
7. 之後轉慢火加蓋煲多50分鐘。
8. 最後加少少鹽調味，之後就飲得啦。
煲過咁多次紅菜頭湯，依款可以話係最好飲嘅 (當然之前嗰啲都好好飲)，因為飲落真係有啲似羅宋湯，有好甜嘅紅菜頭之餘，又有好香嘅西芹味，所以話咁快就成煲KO晒，超有滿足感呢！
溫馨提示：
雖然各種食材都係好溫純，不過始終個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
(文章獲 小小豬Kinsey 授權轉載)