寒流下 健康打邊爐 7大貼士!蔥蒜調味料、先菜後肉 食錯隨時致肥有健康問題 (附優質打邊爐食材) 

寒冷天氣持續,唔少人都會打邊爐暖身,好多人以為打邊爐烚下烚下好健康,但原來一唔小心隨時致肥同引發健康問題,想健康打邊爐就要留意以下7個小貼士。

健康打邊爐

健康打邊爐 7大貼士

1. 蔬菜湯底最健康

麻辣、沙嗲等有一層油的湯底都係高油高鈉,對身體負擔大,應該避免。建議選擇清湯或蔬菜湯底。

2. 煮過肉的湯底唔好飲

放入肉類或者其他食材後,湯底就會充滿油份同脂肪,多喝無益。另外,由於邊爐湯底煮過好多海鮮同肉類,嘌呤 (Purine) 含量較高,多飲有機會引發痛風。如果想飲湯的話,最好飲只淥過蔬菜的湯底。

3. 蔬菜唔好煮太耐

煮得耐會令蔬菜營養流失,啱啱好淥熟就食得。

4. 先菜後肉

蔬菜雖然熱量低,但其實好易吸收油份,所以最好先食菜再食肉。如果響打邊爐後段先淥菜,蔬菜就會好似海綿咁,吸入好多湯汁同油份,脂肪攝取量分分鐘多過食肉。

5. 減少加工食物

貢丸、魚蛋、午餐肉、芝心丸、魚皮餃、即食麵等等,高鈉高脂肪,應少食為妙。

相關閱讀:打邊爐食丸要慎選!消委會指5粒魚蛋已高鈉 加工食物樂齡人少食為妙

6. 原型食物最健康

瘦肉片、手切牛肉、去皮雞肉、海鮮、蔬菜、菇類等都係健康選擇;另外,芋絲、豆腐、非油炸麵類 (例如薯粉、烏冬、蕎麥麵) 都唔錯。

7. 調味料多蔥蒜

蔥蒜可以提升身體免疫力,取代超肥的沙茶醬、麻醬。