祝文君肺癌 病逝終年55歲 50歲以下女性患肺癌明顯增多 6招預防肺癌 香氛精油可免則免？
近日突然傳來藝人祝文君肺癌病逝的悲訊，終年55歲，消息已由好友麥德羅證實。肺癌係香港最常見的癌症，50歲以下的女性發病率更加有上升趨勢，想要預防肺癌，就要有改變生活習慣開始。
祝文君90年代擔任過多個節目的主持，《K-100》、《娛樂新聞眼》、《城市追擊》等都係家傳戶曉的節目，另外她在電影《食神》中的演出都叫人印象深刻。如今突然傳來噩耗，大家都好驚訝，因為她去年底先公開出席過活動，當時無咩異樣，雖然比起以往瘦，但她當時解釋係減肥所致。而響幾日前 (2月28日) ，她先出過Facebook post，上傳親手所種的羽衣甘藍照片，寫道：「我種的一枝獨秀『羽衣甘藍』牛年跟它說聲拜拜 虎年它會否重生？期待」而家睇返，份外唏噓。
祝文君肺癌病逝 近年女性發病率增
肺癌係癌症頭號殺手，根據香港癌症資料統計中心的數據，肺癌響2019年成為香港最常見的癌症，佔所有癌症死亡人數的 27.1%。而響2020年，肺癌佔全球整體癌症死亡率約 1/5。
在香港，自2010年至2019年，各個年齡層的女性發病率都有增加，其中50歲以下女性的發病率上升得特別明顯。相反，男性發病率則有下降趨勢。
改變生活習慣 積極預防肺癌
1. 戒煙／避開二手煙、三手煙
肺癌的發病率同死亡率有直接關係，如果有吸煙習慣的話，建議速快戒掉。如果屋企人是吸煙者，要盡力勸對方戒煙，因為吸煙除了危害對方身體外，香煙所噴出的二手煙，同埋殘留響屋內表面的有害物質 (即三手煙)，同樣會增加同住者患上肺癌的機會。
2. 烹調方式避免煎炒炸
煎炒炸這些高溫烹調的方式，會令油脂氧化、劣化，有機會引致癌症，建議使用蒸煮或者水炒的低油烹調方式。另外，有研究發現煮餸時唔開抽油煙機的女性，患上肺癌機會比有用抽油煙機者高8.3倍，所以烹調時一定要開抽油煙機。
3. 減少接觸拜神香煙
如果有響屋企「裝香」的樂齡人必須慎選香，因為香的質素參差，劣質的香係由工業原料混合製成，多含人工香精、滑石粉等對人體有害的物質。即使係優質檀香，點燃後一樣有機會產生致癌物。如果必須裝香的話，必須注意屋企通風。
4. 不要經常使用香氛或精油
而家愈來愈流行點香氛蠟燭或者用精油擴香機，但最好挑選成分天然、少化合物的香氛同精油，因為如果燃燒時產生芳香胺的化合物，長期使用有機會增加致癌風險。
5. 提升空氣質素
世衝曾發表聲明，指空氣污染係導致肺癌的原因。空氣污染中最危險的就係可堆積在人體肺部深處的細懸浮微粒PM2.5，利用冷氣、加濕器、空氣清新機等，有助降低室內PM2.5的濃度。空氣污染嚴重時，如要出門可以戴有效過濾細顆粒物的專業防塵口罩。
6. 有家族病史應定期檢查
如果家族內有肺癌病史、肺部有慢性病、曾經患肺結核或慢性肺部發炎、居住環境近工廠都屬於高危族群，建議做身體檢查時可以做埋肺部低劑量CT Scan。美國國家肺癌研究團隊發現，有定期做肺部低劑量CT Scan，比起無做的可降低20％死亡率。即使無家族病史，接近50歲時都可諮詢醫生意見，睇下有無需要定期做肺部檢查。
相關閱讀：