3種 蘿蔔營養 功效有咩分別？紅蘿蔔抗氧化 VS 青蘿蔔健脾舒肝 VS 白蘿蔔預防消化道癌
雖然都係叫蘿蔔，但紅蘿蔔、青蘿蔔、白蘿蔔係屬於唔同科的植物，紅蘿蔔係屬於傘形科蔬菜，青白蘿蔔就係十字花科蔬菜，而3種 蘿蔔營養 功效都各有不同。
紅蘿蔔：β-胡蘿蔔素含量最高 抗氧化防癌治乾眼症
紅蘿蔔含豐富β-胡蘿蔔素，含量比其他蘿蔔高出好多倍，100克就已經達到一日所需。由於含β-胡蘿蔔素的食物多數呈橙色，所以由顏色就可以判斷到白蘿蔔、青蘿蔔β-胡蘿蔔素含量唔多。
β-胡蘿蔔素係一種抗氧化劑，有助預防癌症，加上紅蘿蔔蘊含茄紅素，鉀、鈣、鎂、磷、鐵、鋅等礦物質含量都高，對眼睛、皮膚、免疫力都有正面幫助，仲可以穩定血糖、預防三高。
不過要留意，因為β-胡蘿蔔素係脂溶性維他命，遇油先會被人體吸收，所以最理想的烹調方式係用油炒。如果用來煲湯，最好同時加入油脂，幫助身體吸收營養。假如鍾意生食的話，最好食完紅蘿蔔再食一些含油脂的食物，促進營養吸收。
白蘿蔔：含硫化物 預防消化道癌症
白蘿蔔亦係防癌的食物，當中含有的硫化物，可預防胃癌、大腸癌等消化道的癌症。另外，含有豐富的醣類、維他命C、木質素，同埋多種酶等等，其中木質素可以提升免疫力，而維他命C則有助促進新陳代謝功能。
白蘿蔔低熱量而且營養價值高，一般人會用水煮方式將其煮到入味軟腍，但原來高溫加熱會令裡面的營養流失，營養師建議最好以涼拌方式食用，或者稍微煮熟就好。生的白蘿蔔蘊含消化酵素澱粉酶，有助促進胃液分泌同消化。
青蘿蔔：營養價值與白蘿蔔
青蘿蔔富含維他命C同膳食纖維，營養價值同白蘿蔔差不多，不過青蘿蔔的含鉀量係3種蘿蔔中最多，每100克含232毫克鉀 (白蘿蔔173毫克、紅蘿蔔110毫克)，攝取足夠的鉀可預防高血壓，維持心血管健康，同埋令神經和肌肉正常運作。
而在中醫角度，青蘿蔔有健脾舒肝、消積滯、化痰清熱、防口乾舌渴同解毒的功用，用來煲湯或涼伴都適合。