出街食飯點保持健康?糖尿病中餐6大飲食原則:避免精製澱粉質、減少脂肪攝取、少食醬料…

糖尿病患者出街食飯時,無辦法控制食物的份量同烹調方法,尤其是中餐較多碳水化合物,酒樓、茶餐廳、火鍋的菜色偏向油膩,如果想食得健康一點,可以點做呢?

糖尿病中餐

糖尿病出街食中餐6大飲食原則

1. 避免過量攝取精製澱粉質

如果去酒樓食飯的話,因為唔少菜色都係精製澱粉質 ,所以要留意攝取份量,避免血糖快速上升。例如:1中號碗白飯 (5份醣份),可換成1碗白粥、1個蒸包及1條腸粉,進食時可以二擇其一,但避免全部都食。

2. 注意脂肪攝取

盡量揀瘦肉來食,另外,進食肉類時應先進食時應去掉肥肉、雞皮豬皮、酥炸皮層等。

3. 油菜須先過水

即使出街食飯都要保持均衡飲食,每餐要有1-2道蔬菜類菜式,如果蔬菜太多油的話,可以用茶或水過水後先食。

4. 加工食品、內臟可免則免

茶餐廳比較多加工食品,例如香腸、午餐肉等等;而粉麵舖就多內臟菜色,例如牛雜河、豬潤米等,全部都係高脂肪、高膽固醇的食物,可免則免。

5. 少食醬料

中式冷麵或腸粉都會加入好多醬料,如芝麻醬、花生醬、甜醬等,為避免進食過料醬料,不妨要求醬料另上,進食時只沾少量。

6. 打邊爐用香料代替醬料

沙茶醬、叉燒醬、麻辣火鍋等雖然惹味,但高鹽高油,多食無益,可以試試用香料如蔥、薑絲、蒜蓉、辣椒、檸檬汁等去取代。

相關閱讀:糖尿病患者可以飲湯嗎? 糖尿病湯水4大注意事項 滾湯好過老火湯 (附禁忌食材)