人愈大愈易失眠　揀啱床褥提升睡眠質素！揀床褥3大重點　應該偏軟定偏硬？

成日失眠，唔係瞓唔著就係太早醒，或者成晚瞓得唔好……睡眠質素唔好，唔單止影響日間活力，長遠仲會影響健康，加速老化。造成失眠的原因有好多，其中好可能同床褥係咪舒適有關。

據統計顯示，香港大約有12%的成年人患有長期失眠，而中文大學的研究發現，超過7成70歲或以上人士長者認為自己睡眠質素欠佳，當中有3成人更認為自己有失眠情況，而女性及長期病患者有較高機會出現失眠。要為自己營造有助入眠的環境，一張適合的床褥不可或缺，揀床褥時到底有咩要注意呢？應該揀偏軟定偏硬呢？

1. 床褥易軟硬適中

床褥最重要的功能係為身體提供適當的支撐，每個人身高體重都唔同，自然需要的支撐度都唔一樣。太硬的床褥會令身體同床褥的接觸點過份受壓，容易令血液循環唔順暢；太軟的床褥，因身體的壓力需靠肌肉支撐，易造成肌肉疲勞。

如果有骨質疏鬆問題的人士，由於肌肉退化欠缺肌力，較硬的床褥有助身體響瞓覺時放鬆，因為唔需要花力氣維持身體平衡，亦比較容易坐起身。

2. 避免過硬床褥 (或直接睡床板上)

不過唔建議選擇過硬的床褥，或只鋪竹蓆就瞓響床板上，因為會令腰部失去支撐承托，造成腰痛。而本身比較瘦的人士瞓硬床的話，會令身體成個重量壓響幾個接觸點上，造成肌肉痛。

3. 留意床褥高度

另外，必須要注意床褥的高度，太高的床框和床褥會增加跌倒風險，床邊係屋企最易令人跌親的地方，一定要特別留意。每個人身高唔同，最理想的高度係坐響床邊時，雙腳能夠自然平放地面，避免床太高令落床時容易跌倒。