歷來9月最熱！高溫達35.3度 70歲以上要留意 5招預防室內中暑 (附中暑症狀)
早前天文台總部錄得35.3度高溫，係1884年有記錄以來9月最高溫，打破1963年的舊紀錄。日間酷熱同乾燥，天文台提醒大家要注意防暑防曬。即使唔出街，都要注意室內中暑，尤其係高齡長者，一旦出現中暑徵兆，就要盡快處理。
一般來說，年過70歲體力較差的長者，對溫度變化的反應比較慢，如果室內環境悶熱潮濕唔通風，身體無法散熱，亦會有中暑風險。
另外，有慢性病的年長者，要留意長期服用的藥物會唔會抑制排汗／影響身體調節溫度的能力／頻尿，這些藥物副作用都係容易導致高齡長者中暑的原因。
5招預防室內中暑
1. 留意體感溫度，如果高於33度時，一定要馬上幫身體降溫。
2. 控制室內濕度，因為若濕度高達75%時，身體會難以散熱。室內應該保持通風，或開抽濕機降低濕度。
3. 多補充水分，每日飲2000cc水。要留意不能以茶代水，因為茶利尿，飲得太多反而會令身體流失水分，甚至造成脫水。
4. 唔想開冷氣的話，可以響風扇前掛冰袋或已經雪凍的保冷劑，可幫室內降溫又慳電。
圖片來源：Twitter @akihcasam
5. 最直接的瞬間降溫方法係開冷氣，如果唔想將冷氣溫度調得太低，可利用循環扇加速空氣對流，既慳電又可降溫。
如果真係出現中暑症狀：頭暈、頭痛、噁心嘔吐、肌肉無力、皮膚乾燥無汗，體溫達40度以上，就必須馬上處理，最安全的做法係立即就醫，千祈唔好諗住抖一陣就無事，因為嚴重者可致意識不清，甚至有生命危險。
等待就醫期間，盡可能待在陰涼地方，減少身上衣物；用冰毛巾敷響頸部或腋下、鼠膝位，每3分鐘換一次毛巾，維持這動作10至15分鐘。