三文治世代 | 50、60歲中年人照顧上下兩代 疫情下壓力爆煲 3方法保持身心健康 唔好咩都攬上身
三文治世代，顧名思義被夾響中間的一代，大多指50至60歲的中年人，上有高齡父母要照顧、下有成年但未能獨立養家的子女，有些甚至要幫忙湊孫，壓力之大可想而知。
香港人愈來愈長壽，所以未來會愈來愈多三文治世代，我們這群人要肩負起照顧年長父母責任，亦要養育未成年子女、或幫已成年子女湊孫甚至提供經濟支持，說實在，對體能、心理同經濟都構成一定壓力。
疫情下 三文治世代壓力增
特別響疫情下，好多事情都變得唔方便，怕父母唔夠糧食，儲糧時要連父母屋企的份量都一併考慮，相當頻撲，就連幫年長父母剪頭髮的責任都落在自己身上。加上擔心父母染病，所以要勤力幫他們清潔屋企保持衛生，雖然有工人姐姐幫手，但自己唔放心都要成日去睇住，結果都花費唔少心力。
至於往下要養育子女，未成年子女未有經濟能力，仍依賴父母照顧，但因為疫情關係，有些樂齡人開工不足收入減少，為維持一家開支開始需要動用積蓄，對經濟同心理都造成壓力。而另一些樂齡人的子女已經成家立室，可能需要幫手湊孫，但目前提早放暑假，樂齡人要長時間陪伴照顧都唔簡單。
相關閱讀：湊孫壓力大 公婆爺嫲平均每周湊孫36個鐘！即check自己有無湊孫焦慮症 + 3招緩解壓力
種種事情都可能令三文治世代喘不過氣，出現負面情緒，甚至壓力爆煲。身為上下兩代都依賴的照顧者，樂齡人必須保持身心健康，先能夠為家人提供適切照顧。
三文治世代 保持身心健康3式
1. 唔好咩都攬上身
不妨對自己仁善一點，唔好咩都攬上身做，亦唔好認為事情只有自己能做。當覺得壓力過大時，可以請其他人幫忙，例如請其他兄弟姊妹幫手分擔照顧父母責任、請子女暫時自己照顧孫兒，唔需要覺得羞恥或唔好意思，因為自己的情緒健康同樣重要。
2. 保留Me Time
無論幾忙都要騰出Me Time，去散下步、飲杯咖啡、睇套劇……等自己身心靈休息一下，如果可以的話，每天抽30分鐘做運動，可保持身心健康。
3. 調整心態
盡量享受當下，唔好被過多的壓力同焦慮佔據思緒。保持彈性，唔好執著於事情唔跟自己計劃進行，學習欣賞每一件突如其來的事，積極面對處理。假如發現自己情緒真係出現問題，唔需要驚慌或逃避，可多同朋友傾偈疏導情緒，有需要時可尋求專業輔導。