揀錯拐杖隨時愈用愈衰！幫長者揀拐杖 5大細節要留意
年長父母行路開始有點困難，需要拐杖輔助，拐杖睇落簡單，但挑選時有好多細節要留意，如果揀錯了的話，隨時有反效果。
拐杖作為輔助功具，有助支撐使用者身體重量、幫助平衡，提升長者行路時的穩定度，減少雙腳負荷，同時避免跌倒。揀選拐杖時必須留意以下5個細節。
揀選拐杖5大細節
長度
拐杖的長度應根據使用者的身高而定，理想的高度係同使用者髖關節成水平，手臂同手腕用一個自然垂低的姿勢來用拐杖。如果拐杖高度及腰代表太高；如果高度只到大脾、要彎腰先拎得實的話，就代表太矮。
重量
拐杖太過重的話，容易令使用者疲累，但過輕的話又會令使用者失去重心。最理想的重量係250至350克，對平衡感比較差或者曾輕度中風的長者來說，依個重量比較有效輔助行路。
手柄設計
手柄有分C型、T型同埋L型，不過並唔影響安全性同舒適度，只要使用者拎得舒服就可以，但必須注意手柄係咪有防滑功能。
手腕帶
萬一拐杖跌落地下，長者需要彎腰執起，有機會傷及腰膝甚至跌倒，所以最好配備手腕帶，以防滑落。
單腳/ 四腳
單腳拐比較適合大致健康的長者使用，可以提高行路時的穩定度同平衡，購買時要注意底部的防滑功能係咪足夠。而四腳拐比較適合站立平衡較差，或者半側偏癱的中風者，因為底部面積大，可以提供更高的穩定度，不過要注意底部面積太大的話，有機會比樓梯更闊，造成上落困難。
揀錯拐杖或加劇身體痠痛
如果拐杖的高度、重量、手柄設計唔適合使用者，用起上來唔單止無輔助功能，仲有機會加劇腰背同膝頭負擔，甚至造成手腕痛。所以最好帶同長者一齊選購，親身試過先付錢。