自己遺照自己預備！樂齡影樓為客人影生前遺照：至少要留低一張靚相！女性顧客多過男性2倍

之前分享過日本人流行「終活」，即係臨終前嘅準備活動，仍然在生時就為自己規劃好身後事。講到身後事，遺照當然不可或缺，日本就有一啲專為樂齡人士而設嘅影樓，提供紀念照、生前遺照嘅影相服務。

而家唔少人邁入樂齡後都會規劃自己嘅身後事，由葬禮儀式、殯葬安排，到遺照都唔假手於人。日本有啲人為咗想響葬禮時有張好睇嘅相，更加會去影樓拍攝「生前遺照」。

日本流行拍攝生前遺照　女性顧客多過男性2倍

位於東京嘅「笑容照相館」係日本第一間專為樂齡人士而設嘅影樓，老闆太田明良會忽發奇想開一間樂齡照相館，係因為佢發現好多影樓都只係專影婚紗照、親子照，甚至連寵物都有專門嘅影樓，但偏偏人口都好多嘅樂齡人士就無專屬影樓。

影樓2014年開業以來，平均每個月有超過100位客人，預約更加係排到半年之後！太田明良指有啲顧客係專程來拍攝遺照，佢分享道：「有啲女性客人係因為老公過世時，先發現竟然無一張可以當作遺照嘅照片，於是產生『至少我要留低一張靚相』嘅想法。」

而依張「生前遺照」有別於證件相，拍攝氣氛係相當愉快輕鬆，以捕捉被拍攝者快樂幸福的瞬間。太田明良話對於表明係來拍遺照嘅客人，拍攝團隊會盡量令現場氣氛愉快，令對方暫時忘記現實，真正體驗女明星拍攝專業照片嘅感受。

之前有日本雜誌做過調查，發現響60至74歲人士當中，有14.3%女性會事前準備遺照，係男性嘅兩倍！而影樓老闆太田明良話，會來影遺照嘅人，通常都係同親友關係良好親密。

能夠留低張靚相畀屋企人係福份

過去社會普遍認為「幫自己準備遺照」係件唔吉利嘅事，但隨住時代進步，愈來愈多人認同由自己親自規劃身後事依個觀念，透過拍攝生前遺照，亦係其中一個方式令人更能坦然面死亡。

能夠響人生最後階段留低一張好睇嘅相，其實係一種福份。好多人覺得自己老咗唔靚就唔鍾意影相，到最後撒手人寰，屋企人準備葬禮時先發現搵唔到一張好睇嘅相，甚至需要靠合成來製作遺照，多多少少都留有遺憾。準備一張生前遺照唔單止可以減輕家人煩惱，亦係為屋企人留低一個值得回味嘅美好回憶。