蔡瀾介紹深水埗66年中式飯店滿滿人情味 碩果僅存手推點心車 懷舊點心最平$15
蔡瀾近日響個人Youtube頻道《蔡瀾花花世界》介紹一間位於深水埗的傳統中式飯店——有66年歷史的中央飯店，飯店係唔少街坊的聚腳地，無論係裝修、員工、食物定係手推點心車都散發住一種充滿人情味的懷舊味道。
從影片所見，蔡瀾點了一整枱食物，他指在這裡無論係點心定小菜，好多款式都仍有供應，例如比人臉還要大的大包、西米布甸、大良炒鮮奶、菜乾粥等等，而他最鍾意食的就係上海粗炒。
店內嗌點心的方法並唔係劃點心紙，而係由員工推著手推點心車叫賣，蔡瀾指：「手推點心車係碩果僅存，香港無幾多地方有。」飯店由早上6點營業到夜晚10點，下午2點以後點心一律$15，價錢便宜，蔡瀾都忍唔住話：「香港邊度仲食得到？無啦！」
中央飯店的老細伍老闆10幾歲開始做點心，當時師承「海派」，即係上海來香港的師傅，具有相當實力。由23歲開業至今，而家已經89歲的他仍不言休，每日都會在店裡坐陣。店內大部份員工起碼60幾歲，年資已久，伍老闆指伙記都要養家糊口，作為老闆亦要靠他們賣力工作，唔係太離譜的話都無所謂，他又話：「賺到錢就分畀伙記使下，無所謂啦，錢又唔帶得走。」蔡瀾都大讚伍老闆「絕對係一個好人，可以睇得出人性的味道。」
伍老闆話而家店舖後繼無人，打算百年歸老以後就將飯店交還給政府，老闆豁達地說：「再艱辛的時期都捱過，而家有咩所謂吖，一個人睇得開就無所謂！」
雖然老店裝修普通，亦無過人的名氣，但蔡瀾就話唔會差過中環那些名店，「中環又去，深水埗又去，依啲先叫生活。識得平衡的話，依啲就係香港生活。你知道人哋價錢，知道會遇到咩嘢人，同佢哋傾下偈，我鍾意依啲多過中環。」