秋冬頸巾穿搭｜2大技巧揀頸巾：顏色、質地、花紋、長度 揀啱款式展現優雅時尚感
踏入秋冬，好多時出門都會加多條頸巾，千祈唔好睇小依條頸巾，雖然小小一條，但款式同質地多變，只要好好利用來配搭，絕對有畫龍點睛的作用，令人睇落更有時尚感。
1. 因應整體服裝選擇合適的頸巾顏色
頸巾的顏色應該隨住唔同穿著風格而有變化，例如著得比較正式、出席工作場合時，就可以揀黑、灰或深藍色的頸巾，依種襯色非常穩陣唔會出錯。
但由於冬季衣物好多係冷色系，黑色灰色等暗色比較多，如果擔心再配上深色頸巾會太過暗沉的話，可以考慮搭配可能有點米白、杏色、大地色等淺色的頸巾，予人柔和溫暖感覺；又或選擇莫蘭迪色調，例如煙灰紫、霧灰藍等，顯出沉靜優雅的氣質之餘，亦可令皮膚顯白。
至於頸巾花紋方面，格仔花紋或印花圖案都好適合著休閒服飾時配搭，不過由於頸巾已經有圖案，所以建議上身衣服唔好有太豐富的顏色或花紋，避免睇落太過雜亂。
2. 依個人身形選擇頸巾質地及版型
頸巾有唔同質地、厚薄、版型同長度，可按照自己的身高同體型來選擇。比較高的女性可以考慮厚身且長版的頸巾，而身形嬌小的女性可選擇細針織或輕柔的茄士咩頸巾，避免粗冷款式，亦不宜過長或過厚。
