聖誕免費活動！波蘭馬槽雕塑香港首度展出 PMQ睇百年傳統工藝 展期至29/12
今個聖誕除咗可以去商場睇佈置、去海邊睇燈飾之餘，仲可以去PMQ元創方睇首次來香港展出嘅波蘭傳統工藝——聖誕馬槽雕塑，感受歐洲佳節氣氛。
PMQ同波蘭駐港總領事館合作，首次帶來波蘭聖誕馬槽雕塑展。由波蘭著名藝術家 Filip Fotomajczyk 創作嘅聖誕馬槽雕塑，即係耶穌誕生日場景模型。依個工藝係波蘭嘅聖誕傳統，已經有過百年歷史，當地人會將耶穌誕生日場景同波蘭第二大城市克拉科夫嘅建築景點結合， 製作出立體雕塑模型。
克拉科夫市歷史博物館每年都會舉辦設計比賽，每年12月第一個星期四，響克拉科夫大廣場的 Adam Mickiewicz 紀念碑上，會展示創作者們精心製作的耶穌誕生日場景作品，當 St. Mary 教堂號角聲響起，隊伍便浩浩蕩蕩遊行到克拉科夫博物館，進行作品評審。依個傳統由1937年延續至今，2018年時更獲列入聯合國教科文組織的非物質文化遺產名錄。
今次響PMQ展出嘅作品，都係藝術家 Filip Fotomajczyk近年響多場比賽中嘅得獎佳作。作品相當精緻、美侖美奐，大家除咗可以響耶穌誕生日場景作品搵到聖經人物外，細心留意仲會搵到來自克拉科夫傳說，同埋波蘭嘅政治同歷史人物。
波蘭聖誕馬槽雕塑展
日期：即日起至2022年12月29日
時間：11am – 7pm
地點：PMQ元創方 Block B, 5/F, H506-507 (中環鴨巴甸街35號)
門票：免費
除咗波蘭聖誕馬槽雕塑展外，PMQ元創方響今個聖誕新年策劃PMQ Merry Vibes，聯同 Swing Dance舞團「一代搖擺 Swing Pocket」舉行一連串聖誕搖擺爵士派對、快閃表演、搖擺舞初體驗工作坊等節目；跨年期間則由「尋樂 Museek Studio」帶領大家，響慢行同冷門樂器嘅玩樂中，體驗禪行同放鬆。