灣仔海濱全新海上餐廳 邊食邊睇維港靚景 炮台山新增海濱長廊（附前往方法）
港島區又有新景點！灣仔海濱「水上運動及康樂主題區（第三期）」同炮台山「東岸公園主題區（第一期甲）」早前正式開放，港島北海濱長廊延長至8.7公里，仲首次響海濱共享空間引進海上餐廳！灣仔海濱「水上運動及康樂主題區（第三期）」位於鴻興道，北望維港，毗鄰香港遊艇會及水上單車租用處，連同早前已開放嘅第一期同第二期，成個主題區佔地約1.3公頃。新開放嘅場地提供戶外桌椅、遮蔭棚、餐飲、洗手間、育嬰室同淋浴室等設施，仲設有多功能活動空間畀市民使用，亦方便之後舉辦更多水陸活動。
最特別係首次響海濱共享空間引進海上餐廳，餐廳停泊響主題區水體上，主要用作舉辦宴會同活動。另外，新開放嘅主題區亦有一間佔地約300平方米嘅陸上餐廳，市民可響室內用膳，亦可到頂層同露天用餐區，一邊用餐一邊遠眺維港景色。
而炮台山「東岸公園主題區（第一期甲）」就位於興發街以西，即已開放嘅主題區（第一期）南端，佔地約1300平方米，新增65米長嘅海濱長廊同休憩設施。第一期甲啓用後，市民可由東岸公園主題區沿威非路道休憩花園及銅鑼灣消防局，前往銅鑼灣「活力避風塘主題區」。
上述兩個主題區都係寵物友善場地，歡迎市民帶同繫上牽繩嘅寵物到訪。
灣仔「水上運動及康樂主題區（第三期）」前往方法
– 從灣仔渡輪碼頭沿鴻興道前往，步程約五5分鐘；或
– 從港鐵會展站A2出口前往，步程約五5分鐘；或
– 從港鐵銅鑼灣站C出口，經堅拿道西天橋前往，步程約9分鐘
炮台山「東岸公園主題區（第一期甲）」前往方法
– 從港鐵天后站沿電器道至永興街，再轉入興發街前往，步程約8分鐘；或
– 從港鐵炮台山站經油街轉入電器道，至屈臣道並經主題區第一期進入，步程約9分鐘