粉嶺賞花好去處｜洋紅風鈴木開始盛放 粉嶺中心行人天橋成打卡熱點 (附前往方法)
最近粉嶺中心行人天橋經常堆滿人潮，大家都拎住電話、相機影唔停，更有人出動長鏡頭，而拍攝對象係一棵正逐漸盛開嘅洋紅風鈴木，一片粉紅相當夢幻。
洋紅風鈴木屬紫葳科喬木，原產自熱帶地區，通常響早春開花。樹高可達 25 米，樹冠廣，花開淡粉紅，花多葉少。除咗滿樹繽紛外，落花更鋪滿地上，彷彿粉紅花毯，打卡一流。
康文署嘅賞花情報網站響2月7號更新，指粉嶺火車站遊樂場嘅洋紅風鈴木開花指數有2朵 (總分5朵)。遊樂場內種有3棵洋紅風鈴木，每當開花時，一片紫色紅色，如夢似幻，絕對可以媲美櫻花，所以每年花期都吸引唔少市民去拍照打卡。
雖然3棵洋紅風鈴木種響粉嶺火車站遊樂場，不過打卡熱點就位於粉嶺中心行人天橋上，因為同花朵一樣高度，可以近距離欣賞粉紅嘅花瓣，影相時亦影得更清楚。花期期間天橋上人多擁擠，大家打卡時一定要注意安全！
前往方法：
1. 港鐵
粉嶺港鐵站A2出口，沿粉嶺車站路往粉嶺中心方向步行約5分鐘
2. 途經巴士路線
79K, 261, 279X, 277X