鐵達尼號25周年紀念 重製 3D／IMAX 3D 再登大銀幕 全港多間戲院經已上映
唔經唔覺《鐵達尼號》已經面世25年！今年適逢25周年紀念，片商特地推出重製版，以 3D 及 IMAX 3D 版重新登上大銀幕，現已於多間戲院上映。
1997年《鐵達尼號》初上畫時，聲勢一時無兩，由金像票房至尊大導演占士金馬倫執導，顏值處於巔峰狀態嘅俊男美女——里安納度狄卡比奧、琦溫絲莉主演，以當時世界上最巨大嘅郵輪鐵達尼號沉沒事件為背景，描述男女主角Jack同Rose一段至死不渝嘅淒美愛情故事。
想當年唔少人都入戲院一睇再睇，《鐵達尼號》票房超過21億美元，成績驚人，票房冠軍紀錄更保持咗足足12年，到2009年先被《阿凡達》打破，值得一提嘅係，《阿凡達》都係占士金馬倫嘅作品。
《鐵達尼號》當年仲橫掃金球獎、奧斯卡等超過50項大獎，單係響奧斯卡就獲得11項大獎，包括：最佳電影、最佳導演、最佳攝影、最佳視覺效果、最佳原創歌曲等。電影入面嘅經典場面同對白，依然叫人刻骨銘心，”I’m the King of the World”、”You jump, I Jump”，絕對係單睇文字都有聲有畫面！
仲有主題曲〈My Heart Will Go On〉唱到街知巷聞，唔單止獲得「奧斯卡最佳原創歌曲獎」，連專輯都大賣，為唱片公司帶來10億美元收入。
今次《鐵達尼號》重製3D 及 IMAX 3D 版再登大銀幕，為觀眾帶來唔一樣嘅視覺享受，機會難得，如果想回味依套永恆經典就唔好錯過。《鐵達尼號》重製版已於多間戲院上映，包括：MCL、Cinema City、英皇戲院、嘉禾，一於去重溫美好集體回憶！