【食譜】陳皮冰糖燉檸檬 健脾和胃、潤肺止咳、紓緩喉嚨痛
成日睇介紹話陳皮冰糖燉檸檬好有效，所以攪到我都心思思想試下，不過一聽見話要燉15小時，所以都唔敢動手。不過……其實我內心深處都係有啲癮好想試下，加上又俾好友講一講，所以就的起心肝買齊材料去開工啦！
陳皮冰糖燉檸檬都有好多好處，冰糖同陳皮就有助健脾和胃、潤肺止咳作用，而檸檬可消解胃氣同埋咽痛喉乾，燉足15個鐘嘅陳皮冰糖燉檸檬就對喉嚨痛、咳嗽濃痰、咽喉炎同埋慢性支氣管炎都會有改善。
材料：
材料就只係需要依三樣檸檬同冰糖嘅份量就係1:1.1，即係每次都用1000g檸檬就用1100冰糖，陳皮就大約一兩半。
睇FACEBOOK好多朋友都介紹用馬莎出嗰一隻無蠟嗰隻，咁我又跟住用依款，雖然就貴少少，不過感覺好似安全啲嘛！
做法：
1. 檸檬先用鹽水浸至少半小時，然後除去中中間白芯及頭尾。
2. 然後切片，之後去走啲檸檬核。
3. 切片後需要印一印乾水份呀。
4. 陳皮浸軟挖囊，然後切絲。
5. 切絲後亦都需要印乾水份呀。
6. 之後可以一層檸檬一層冰糖咁放入燉盅內。
7. 最後一層就加入陳皮絲。
8. 最後就可以放入電子燉盅燉15小時。
9. 燉嘅途中記得要定時加熱水落燉盅外，以免燉乾水。
10. 燉夠15小時之後，放涼一陣就可以入樽啦。
11. 飲嘅時候就只需要因應個人口味，濃淡隨意加入熱水就飲得。
最好記得要食埋啲渣呀！
咁辛苦整好就當然要即刻試，入口就有好香嘅陳皮味，而且又有少少甘甘地，味道都OK。不過飲完喉嚨又有少少涼涼地，飲完又真係覺得幾舒服哦！
溫馨提示：
– 由於個別人仕體質不同，所以大家記得煲之前了解下自己，如有疑問，請先向註冊中醫查詢！
– 全部材料同用具不用加水，重要係不可以有水份，所以一定抹乾！
– 由於全天然關係，所以一定要放雪櫃，而且要三個月之內飲完呀！
(文章獲 小小豬Kinsey 授權轉載)
～ 金銀島新設Whatsapp群組，發放最新50+相關資訊，歡迎您一齊分享，傾下計。 有興趣請 按此入谷 ～