MIRROR Edan呂爵安主演賀歲片《闔家辣》疫情在家工作兩代爆笑矛盾
入戲院睇賀歲片係過年指定動作，今年賀歲片又點少得MIRROR成員Edan呂爵安有份主演的《闔家辣》，不過根據現時防疫措施，戲院唔知幾時會重開，希望有機會可以入戲院睇啦！
呂爵安首次進軍影壇
MIRROR成員Edan呂爵安首次登上大熒幕，同吳君如、鄭中基、梁詠琪一齊主演賀歲片《闔家辣》。預告片所見，Edan戲入面唔單止使出招牌反白眼，試食辣椒醬後仲做出誇張式大叫，超搞笑！
演繹疫情期間 在家工作的兩代矛盾
故事講述疫情期間，打工仔要在家工作，同屋企人相處時間大增，鬧出好多笑話。Edan呂爵安飾演的角色Coba，因為爸爸 (鄭中基飾) 同媽媽 (梁詠琪飾) 日日賦閒在家，為了令他們唔好煩住自己work from home，於是安排他們整辣椒醬拎去賣，爸媽負責剁辣椒整醬，Coba負責設計包裝，原意係想父母有世藝唔好搞住自己，點知因為生意太好，反而觸發出更多家庭矛盾！
大家仲記唔記得疫情初期，仔女要在家工作時有無發生過趣事呢？那時聽唔少退休朋友講，仔女同同事視像會議時，自己成日唔小心經過入鏡，或者叫仔女飲湯時被他們的同事聽到，雖然當時覺得好尷尬，但相信都係一個疫情期間限定的有趣回憶。
配合防疫措施 最快年初四有望上映
本來《闔家辣》會在新年檔期上映，但因為防疫措施延長至2月3號，戲院依段期間要暫時關閉，所以最返都要去到2月4號年初四先有機會睇到！希望一切順順利利，戲院可以如期重開，等大家入場睇賀歲片開心下！