隔離營必帶物品 入竹篙灣要帶齊依16樣物品 長期病需食藥必須注意一件事!

疫情持續爆發,確疹數字上升,如果真係唔好彩需要入竹篙灣隔離,記得執齊以下16樣「隔離營必帶物品」,可以令隔離生活舒適一點。

唔少入過竹篙灣隔離營的人士話,那裡雖然設備簡單,但都叫乾淨實用,不過最好自備各類物品,就可以住得更加舒服。

隔離營必帶物品

隔離營提供的設備:

電視機、冷氣、軟布衣櫃、床、枕頭、被、書枱、摺櫈、床頭櫃、熱水壺、風筒

隔離營提供的設備物資:

洗面毛巾、沐浴毛巾、牙膏、牙刷、紙杯、沐浴露、洗髮水、衣架、卷裝廁紙、樽裝蒸餾水、餅乾、杯麵、2GB上網用SIM卡。

*無雪櫃、無洗衣機、無Wi-Fi

16樣 隔離營必帶物品

醫療類:

1. 醫生處方之藥物

人到中年,唔多唔少都有長期病需要keep住食藥,但竹篙灣係禁帶未經醫生處方之藥物,所以最好問定醫生拎醫生紙做證明,同埋要記得帶夠14日藥。另外,房裡面無雪櫃,如果藥物需要放雪櫃的話,要先問職員點處理。

寢具類:

2. 枕頭

人愈大愈認床,唔係度度都瞓到,隔離營提供的枕頭的高度和軟硬度未必啱瞓,最好自備。

3. 枕頭套、被袋

隔離營提供的並非全新,介意衛生的話最好自備

4. 毛毯或睡袋

怕凍的朋友要帶多張毛毯或者睡袋,暖笠笠先有覺好瞓

飲食類:

5. 美極、杯麵、乾糧零食、日本豆苗

傳說中的隔離營伙食好可怕,味道日日都一樣,帶齊食物同調味料,叫做多點變化。

6. 旅行水煲

雖然竹篙灣有提供熱水壺,但相信無幾多個人夠膽用,煲水飲落肚的物品,都係自備吧。

7. 小型煮食煲

可以用來翻熱食物或者煮公仔麵。

生活物品類:

8. 清潔用品

洗手液、消毒噴霧等,可來清潔房內設備。

9. 洗潔精

10. 指甲鉗

11. 盒裝紙巾

隔離營只提供卷裝廁紙。

12. 多套替換衣物及內衣褲

營內無洗衣機,但有提供洗衣粉,唔想手的話就要帶夠14日衫。

娛樂類:

13. 大容量數據卡

隔離營無Wi-Fi,只提供2GB上網用SIM卡,如果打算上網煲劇的話,就要自備大容量的SIM卡。

14. 拖板

竹篙灣隔離房間裡面只得兩個插蘇位,帶定拖板去,就唔驚插蘇唔夠用,要又拔又插咁麻煩。

15. 叉電器

16. 瑜珈墊

要困響間房14日,帶定瑜珈墊去做下運動,活動身體保持健康

如果真係帶漏物品都唔使擔心,入住後可以叫親友送物資入去,不過要注意返,香煙、酒精類物品同中藥物品係唔可以帶入檢疫中心的。

相關閱讀:唔知幾時中強檢! 執定「強檢走路袋」必備5樣物品 輕鬆渡過排隊時間