分享 衣櫃斷捨離 8大心得 其實你沒有那麼需要它!50歲過後丟掉無用之物 感受前所未有的清爽

第五波疫情下,多了時間留響屋企,望見一屋雜物,於是開始動手清理。好多衫褲一直唔捨得丟掉,但原來當狠下心送走雜物、望見屋企乾淨闊落,感覺係咁清爽!以下分享幾個 衣櫃斷捨離 心得,希望幫到大家!

衣櫃斷捨離

衣櫃斷捨離 8大心得

1. 超過3年無著的衣物 – 掉!

每次想丟掉前都總覺得仲有機會再著,但一年復一年都無著過,來到第3年了,係時候放手了。除了衫褲外,已經3年無用過的皮帶、太陽眼鏡、帽亦採取同樣處理方式。

2. 著唔落的衣物 – 掉!

幻想有一日自己會減肥成功,到時候就可以再著依件衫,不過問題係…… 幻想唔知幾時先會實現。如果減肥成功的話,到時再買新衫慶祝吧,至於現階段著唔落的衫褲,請放手。

3. 沾了醬汁污跡的衣物 – 掉!

沾了醬汁污跡的衣物就像雞肋,丟掉覺得可惜,但著出街又怕被人見到污跡唔體面。如果可以的話,就將依種衣物當家居服著,著舊了就丟掉。

4. 變得殘舊的衣物 – 掉!

衣物已經起毛粒,或者領口已經變鬆,應該唔會再著出街,就丟掉吧。

5. 為了免運費而買但其實唔太鍾意的衣物 – 掉!

現代人鍾意網購,為了湊免運費好多時都會多買一些唔太鍾意亦唔太需要的物品。坦白講,買回來之後你有著超過3次嗎?沒有的話請丟掉。

6. 旅遊時買的當地衣服 – 掉!

去旅行時受當地氣氛感染而買了一堆民族服、首飾、手袋,甚至寫住「I love XXX」的T恤,這些衣物帶回香港後有著過用過嗎?如果無的話,答案已經好清楚。假如物品充滿回憶,可以先為物品拍照再丟掉。

7. 發黑的首飾 – 掉!

首飾會發黑代表你已經好耐無用過了。丟掉可惜,好好清潔就能再戴?但上一次整理雜物時都係咁諗,結果又過了一年依舊無清潔過,或者係代表你已經不需要這些首飾了。

8. 備用鈕扣 – 掉!

好多新衫褲都會附一粒備用鈕扣,一直儲起以防萬一,結果愈儲愈多,多到都唔知邊粒鈕屬於邊件衫褲,而衫褲上的鈕扣卻無想像中咁易唔見。

相關閱讀:過期雜誌、傳單、空罐唔捨得掉?囤物症3大特徵!4招改善囤物習慣 人到中年要過得更清爽