澳洲安老院設九巴車站？ 人性化安老院 為失智症院友設巴士站重溫回憶 站牌從香港直送
澳洲一間安老院裡面竟然有個九巴車站？站牌仲係由香港直送？依間位於墨爾本的「安老之家」係一間 人性化安老院 ，院友好多都係香港人，員工為了幫一位失智症院友重溫舊日回憶，不惜絞盡腦汁響院舍入面設置了一個巴士站！
為失智症院友而設的香港巴士站
響「安老之家」入面的香港巴士站，放著一個貨真價實的九巴站牌、一張長櫈，車站對面的大電視牆不停播放香港街景，為求逼真，員工仲自己動手造了一個雨篷。依一切原來係為了一位失智症院友而做。
依位失智症院友「姨姨」來自香港，曾經有段時間每日都會響院舍走來走去，話要搵巴士站，因為要搭巴士去湊仔。可是因為姨姨有失智症，唔方便帶佢出街，員工就開始構想，不如響院舍入面整個巴士站，一完姨姨心願，等佢可以重溫舊時響香港的回憶。
巴士站的靈魂當然係站牌，員工決定搵九巴幫手，估唔到九巴好快就答應，唔單止由香港直送站牌去澳洲，就連站牌上的路線都幫手設計，仲特地加上「安老之家」站，印埋專屬QR Code，等其他院友可上網睇相關路線。
整好巴士站之後，員工們本身好期待姨姨去「等巴士」，但失智症病情難以預料，萬事俱備，故事主角卻忘記了自己要搵巴士站…… 等了又等，直到某日，員工終於見到姨姨坐在巴士站的長櫈上，並示意員工坐下一齊等巴士。院舍行政總監劉福娣話，睇見姨姨終於記起，自己都忍唔住喊，雖然姨姨好快又忘了依段往事，但至少有一刻姨姨係記得返，能夠幫姨姨搵返舊日回憶，她認為一切努力都值得了。
除了幫姨姨重溫舊時回憶外，其他香港院友見到巴士站都好開心，得閒就會過去坐坐「等巴士」，回味香港往事。其中一位院友的孫兒未曾去過香港，院友就藉住巴士站同電視街景同孫兒介紹香港，細說自己的童年。
每周設「飲茶日」 院舍行政總監：希望長者唔好覺得自己住緊安老院
除了設巴士站外，院舍每個星期五也定為飲茶日，讓長者食香港點心如蘿蔔炆牛肚。院舍行政總監劉福娣希望透過香港食物、街景、巴士站，為院友帶來熟悉感，令他們彷如置身社區中，生活與其他人無異，而不會覺得自己住在安老院。不過劉福娣並未滿足於此，她下個目標係讓院友響院舍裡面「坐巴士」，目前的構想係小型巴士，響院舍設幾個車站，等院友可以從一個地點搭去另一個地點。
劉福娣認為住響安老院的長者最需要的係，同一般人一樣咁生活。正如一位院友所說：「(安老院) 給我們的感覺好緊要，如果唔係多姿多彩會好苦悶；如果能夠多姿多彩，就會開心好多。」