7大最難斷捨離物品名單！書本、童年回憶物品、明信片……你中咗幾多樣？
斷捨離難唔難，好多時係取決於心態，一直執著過去、對未來感不安的話，一定會想留起全部物品，樣樣都唔掉得！以下係7大公認最難斷捨離物品，你中咗幾多樣？
1. 書本
當初用咗好多錢買書，加上有些書本未睇完／睇都未睇過，就咁掉咗實在可惜，或者將來有日會睇呢？所以即使書本已經封曬塵都唔捨得掉，成為家中最佔空間的雜物之一。
2. 童年回憶物品
幼稚園的畫作、小學成績表、中學用過的筆袋……甚至係第一份工作的記事本，全部都充滿回憶，唔捨得斷捨離似乎好合理？如果回憶物品數量太多，多到佔據屋企大部份空間的話，建議揀選一部份留著，其餘拍照留念後就可以考慮放手。
3. 食物、調味料
餅乾、薯片、茶包、各式各樣的調味料，每次見到特價就大量購入，好多時根本忘記自屋企仲有而重複購買，最後放到過曬期，浪費金錢之餘又浪費食物。下次想買之前，先諗諗屋企仲有無，同埋自己係咪真係需要？可以避免造成浪費。
相關閱讀：廚房斷捨離 7種應該馬上丟掉的物品 整理心得：唔好諗「將來可能有用」，要諗「而家有無需要用」
4. 衣服
衣櫃裡面一堆只著過一次、唔啱著但又唔捨得掉、有點殘舊但仲著得的衣服，因為總覺得「之後可能會著」而無辦法斷捨離，唔掉舊衫但又繼續買新衫，搞到衣櫃愈來愈爆，不如得起心肝將好耐無著過或已經變得殘舊的衫褲都丟掉吧！
相關閱讀：分享衣櫃斷捨離 8大心得 其實你沒有那麼需要它！50歲過後丟掉無用之物 感受前所未有的清爽
5. 明信片、書信
朋友旅行時寄來的明信片、讀書時同同學通訊的信件，全部都係珍貴回憶，掉咗就無。如果真係唔捨得掉的話，建議好好整理再放入密實盒保存，以免紙張受潮發霉。
6. 舊式影音產品
有幾多人屋企仲有錄影帶、錄音帶、CD、LCD？但仲有無可以播放這些影音產品的機器？當年花咗一番心機先儲到，今日要斷捨離可能真係唔捨得，畢竟係充滿住昔日追星回憶！
7. 奢侈品
名牌手袋、比較貴價的珠寶首飾、潮流服飾等等，可能因為款式過時，或者自己著衫風格改變等原因而唔再使用，但畢竟物品價格高，唔會捨得直接掉落垃圾桶。如果真係唔再需要，不妨送給親友，或者透過二手平台轉售，將舊物轉化成金錢。