英國太太每日風雨不改到地鐵站 只為聽”Mind The Gap”廣播 背後故事太感人
英國有一位老太太Margaret McCollum，自2007年開始每日都會去倫敦地鐵Embankment站，但係佢並唔係去搭地鐵，每日風雨不改坐響月台，只為列車進站時聽聽亡夫的聲音，感覺同亡夫仍有聯繫。
Margaret係一名醫生，而佢丈夫Oswald Laurence生前係個演員，同時亦係配音員，畢業於皇家戲劇學院。響Oswald眾多工作裡面，要數最簡短但最為長久使用的，就非 ”Mind the Gap” 莫屬，依句提示語係佢響1950年代初為倫敦地鐵北線錄製，一直使用多年。
2007年Oswald過世，為了一解對亡夫的思念，Margaret每日都會去到站，等待列車進站時可以聽聽亡夫的聲音，時間雖短，但都令佢感到同丈夫仍有聯繫。Margaret依個習慣足足維持咗5年，直到2012年年底某日，Margaret如常來到車站聽Oswald把聲，但佢赫然發現廣播聲音竟然唔同咗！
同Oswald的連繫突然消失，Margaret感到極度震驚，於是去服務處詢問，先知道所有車站都換上新的數碼廣播系統，Oswald的人聲版本唔會再用，換句話講，Margaret唔會再響車站聽到Oswald聲音。
Margaret於是聯絡倫敦地鐵，向對方講述 “Mind The Gap” 廣播對佢嘅意義，詢問對方可唔可以搵到亡夫的錄音帶，畀佢帶返屋企聽。當倫敦地鐵知道Margaret的故事後，唔單止馬上搵出錄音交畀Margaret，仲響2013年初將Embankment站的進站廣播改返做Oswald錄製的版本。
倫敦地鐵當時的營營總監Nigel Holness說：「我們被她的故事深深感動，所以我們的員工翻查紀錄，唔單止搵返Oswald嘅聲音畀佢留念，仲決定響Embankment站繼續播放Oswald嘅聲音。」
依件感人事件雖然係10年前嘅事，但因為近日有外國網紅再次分享而再度獲得關注，好多網民都想知Margaret近況，想知佢仲有無每日去車站，但可惜暫時仲未有佢嘅消息。至於Oswald嘅 “Mind The Gap” 聲音，就仲可以響Embankment站聽到。Youtube上有影片，有人響2022年3月17日去過Embankment站拍攝，當時的 ”Mind The Gap” 廣播仍然係Oswald的人聲版本，大家有興趣不妨去聽下依段播足70年的錄音！
2022年3月17日 Embankment站 ”Mind The Gap” 廣播：