粵劇名伶阮兆輝首登兒童劇場　破格跳舞演出　《樂樂公公唱唱貢》三代同堂賞南音

July 9, 2022July 13, 2022 曾慕雪, 粵劇, 藝人, 阮兆輝

粵劇名伶阮兆輝首次登上兒童劇場，仲即席唱歌跳舞！不過依套唔係普通的兒童劇，而係結合了「南音」，用一個輕鬆的方法將傳統文化介紹給小朋友，7月15號公演，最啱大家帶埋孫仔孫女一齊去睇！

粵劇名伶-樂樂公公唱唱貢

用南音唱小朋友日常生活

阮兆輝 (輝哥) 響兒童劇《樂樂公公唱唱貢》飾演「公公」一角，導演兼演員曾慕雪 (Musette，上圖右) 話角色係為輝哥度身訂造，故事講述三代同堂的種種日常，內容相當生活化，「而家好多小朋友都係由公公婆婆、爺爺嫲嫲湊，三代同堂係一個好常見的家庭組合。」而輝哥係南音的代表人物，亦好適合公公的角色，所以就創作了這個故事，當中有一幕係公公同孫仔孫女用ZOOM視訊傾偈，相信係現今好多公婆爺嫲的的寫照，能夠引起祖孫共鳴。

粵劇南音多數予人憂鬱悲情的感覺，例如名曲《客途秋恨》和《霸王別姬》都係帶有哀傷嘆息之情，到底要點樣融入兒童劇呢？Musette解釋：「其實南音係一種唱歌格式，配上音樂以說唱的形式來講故仔。」一般人認識的粵劇曲目都係以前時代的人唱以前時代的故事，所以容易有種古舊的感覺，而《樂樂公公唱唱貢》就係抽取了南音說唱的特性，用來講一個適合小朋友睇的現代故事，劇中有一幕係小朋友用IQ題考公公，當中就係用了南音的說唱方式去演繹，祖孫三人爽快問答，展示出南音獨特的節奏感。

粵劇名伶-阮兆輝

輝哥演藝生涯首次公開跳舞

而輝哥今次響劇中都有好多突破，唔單止用一個全新形式演繹南音，同時要背大量台詞，仲有第一次響台上跳舞！Musette笑說輝哥響接到劇本前並唔知道要跳舞，當排練到跳舞時，輝哥都問：「你真係要我跳舞？我真係唔得架喎！」

不過Musette指輝哥係一個思想開放的藝術家，好願意嘗試新事物，「雖然佢做了幾十年戲，但兒童舞台劇脫離佢熟悉的領域，今次佢好多新嘗試，好似跳舞咁，佢應該70年都無試過。我估對佢來講係好難，同以往好唔同，有要適應的地方，輝哥都花咗唔少努力。演員上台表演最緊要有信心，我身為導演最緊要畀到輝哥信心，令佢發揮到本身的魅力。」最後輝哥為了齣戲好睇都樂力照做，雖然只係公公同孫仔孫女一齊輕鬆跳下舞，但都好值得大家期待！

粵劇名伶-阮兆輝-兒童劇2

粵劇唔係博物館嘅野

Musette係「一桌兩椅慈善基金」的創辦人，近年致力推廣粵劇文化，讀西方戲劇出身的她自言唔算粵劇迷，不是那種會不分晝夜去睇劇的狂迷，只係人愈大，愈識得欣賞依種傳統藝術，「我家人鍾意睇粵劇，但我細個唔識欣賞，覺得悶悶地。讀戲劇後成日同輝哥傾偈交流，講好多表演藝術，令我愈來愈喜歡粵劇戲曲藝術。喜歡係來自尊重，欣賞粵劇裡好多細節，覺得好精采。」

好多人對粵劇先入為主，認為長輩先睇，Musette對此感到可惜，「南音好代表到香港，因為係用廣東話演繹，係屬於香港人的生活。」

為扭轉普遍人的刻板印象、透過新角度認識粵劇，Musette同基金另一創辦人鄭思聰 (Henry) 一直作多方面嘗試，之前亦試過找張敬軒同輝哥 crossover《魂遊記》，將南音融入流行音樂當中。鄭思聰說：「以前的南音就好似現時的流行曲，相當popular，杜煥 (南音大師) 會響電台做節目好多人聽，可能好似而家的MIRROR。只係歌詞內容係以前的故事、舊時有共鳴的事情，一直無將歌詞內容拉近返現代生活。」

他們的做法係將粵劇的元素、核心價值拆解，拿出來轉化成新的作品，令作品同現今生活有連結，例如今次兒童劇就係採用了南音的格式。Henry續說：「我們想告訴大家粵劇唔係博物館嘅野，粵劇最核心地方不能改變，但同時探索如何同其他流行樂元素crossover，首先引起大家興趣，撒種子響小朋友心中，等他們自行發掘更多傳統文化的趣味。」

粵劇名伶-阮兆輝-南音