92歲日本婆婆遊戲實況Youtuber 坐擁55萬粉絲！頭腦超靈活 打機組隊比賽四戰全勝
大家對90歲的高齡長者有咩印象？手腳慢、頭腦唔靈活、需要人照顧？以下介紹依位92歲的日本婆婆——森浜子絕對會顛覆大家想像！森浜子係一位遊戲實況Youtuber，坐擁超過55萬粉絲，唔少網友都好鍾意睇依位婆婆打機！
森浜子最近玩的遊戲係《Splatoon 3》，係一款組隊比賽遊戲，玩家要同隊友合作以取得勝利。響遊戲中，玩家要邊走邊將地圖油上隊伍顏色，同時要防禦敵隊攻擊，仲要兼顧補充顏料。遊戲講求速度同反應，一個唔留神就會輸掉。
不過對92歲的森浜子來說，似乎無咩難度。森婆婆話自己之前未玩過Splatoon第一、二集，今次亦係第一次玩第三集。她在Youtube頻道中分享了四場比賽，同隊友默契十足，補顏料、搶地盤、出絕招，完全難唔到森婆婆，更加係四戰全勝，而且仲可以一邊打機一邊說話！
除了Splatoon外，森浜子仲有玩好多唔同類型的遊戲，由家居運動的《Nintendo Switch運動》，到打鬥類型的《GTA V》，到益智類的《Minecraft》，婆婆都有玩過，有興趣的話可以去森浜子婆婆的Youtube頻道「Gamer Grandma」睇睇！