膠袋徵費懶人包｜31/12起加至$1 買凍肉、麵包、生果有無免費膠袋？3種情況豁免收費
提提大家，2022年12月31號開始，就會實施「優化塑膠購物袋收費計劃」，膠袋徵費將會由原先的$0.5上提高至最低$1，而豁免範圍亦會進一步收緊。想知買啲咩先可以獲得豁免膠袋徵費，繼續睇落去就知道！
膠袋徵費懶人包
1. 問：最新膠袋徵費係幾多錢？
答：每個膠袋嘅最低收費會由本來嘅$0.5加到$1。
2. 問：已包裝嘅凍肉、雪糕、凍飲仲可以有免費膠袋嗎？
答：新措施下會取消現時對盛載冰凍或急凍食品的豁免（包括透明平頭膠袋），即係話12月31號開始，購買凍肉、雪糕、凍罐裝汽水等等，唔會再有免費膠袋提供，要至少收$1。
3. 問：咩情況先可以豁免？
答：有3種情況可以豁免徵費，獲得免費膠袋：
– 無包裝嘅食品（例如：散裝水果、蔬菜、麵包）
– 並非完全載於任何包裝的食品（即有部份外露）
– 以非氣密包裝的餐飲外賣（例如：餐廳外賣、紙杯裝外賣）
以上情況可獲免費提供膠袋，不過每單交易原則上只會畀一個免費膠袋，除非個袋唔夠大、只用一個袋會令膠袋破損、或將所有食品放入同一個膠袋會令食品受損，先可以有額外免費袋。
4. 問：去街市肉檔、魚檔、菜檔、水果檔購物，可以有免費膠袋嗎？
答：如果上述食品無預先包裝過，或無完全包裝好，咁就依然可獲免費提供膠袋。
5. 問：去超市買保鮮紙包裝的肉類、蔬果等，可以有免費膠袋嗎？
答：唔可以，由於已完全盛載響氣密包裝內，由透明膠膜完全密封，所以不會獲免費膠袋。另外，盛載響非氣密包裝的食品一樣不獲豁免，即係話，裝響有氣孔嘅袋或盒入面嘅蔬果都不能獲免費膠袋。
一圖睇清膠袋徵費新措施 & 豁免情況