簡單4步驟查醫療券餘額　用手機都得！每人最多儲$8000

長者醫療券計劃推出多年，每位65歲或以上嘅香港居民，每年都可獲發$2000醫療券*。一般來說，政府會響每年1月1日將醫療券金額存入使用者戶口之內，如果想CHECK醫療券餘額，可以跟住以下方法做。

合資格使用醫療券人士

– 年滿65歲或以上

– 持有效香港身份證

– 每年可獲發$2000醫療券*

– 最多可累積至$8000

*《施政報告2022》宣佈實施為期3年先導計劃，將醫療券金額由$2000有條件地增加至$2500。當使用者將至少$1000醫療券用於預防疾病同健康管理等用途後，增添嘅$500會自動發放至其戶口。至於先導計劃幾時落實同埋詳情，就要再等公佈。

醫療券用途

醫療券適用於已登記參加計劃的服務提供者，大家可以用來睇私營西醫、中醫、牙醫、第1部分註冊視光師、脊醫同物理治療師等專業人士。

想知邊啲服務提供者已登記參加計劃，可以去醫療券網站「醫健通」，查閱已登記醫療服務提供者嘅名單。或者去到診所時，睇睇診所外有無貼住醫療券標誌，可以憑此識別該診所有無參加計劃。

使用者要留意返，醫療券唔適用於純粹購買用品，如藥物、眼鏡，海味或者醫療用品，亦唔可以用於獲政府資助嘅公共醫療服務（除特別註明外），住院服務或日間手術程序亦唔適用。

《施政報告2022》宣佈將適用範圍擴大至「認可醫療專業註冊計劃」的聽力學家、營養師、臨床心理學家和言語治療師，同埋經專業評定並提供嘅醫療設備，例如助聽器等。不過目前尚未公佈實施時間，「醫健通」網頁上已登記醫療服務提供者名單暫時未有以上幾個類別。

查詢醫療券餘額方法

一、於「醫健通」網站查詢

大家可以使用電腦或手機去「醫健通」網站查詢醫療券餘額，過程同樣簡單，只需輸入以下4項資料就得。

1. 目前持有嘅身份證明文件 (選擇香港身份證或豁免登記證明書)

2. 香港身份證號碼

3. 出生日期

4. 驗證碼

查詢醫療券餘額網頁：按此

二、醫療券使用記錄

除咗去「醫健通」網站查詢外，其次醫療服務機構每次扣除醫療券金額後，都會發給長者一張「醫療券使用記錄」。記錄上會清楚列明扣取前、已扣取及剩餘嘅金額。

三、致電查詢

致電醫療券結存查詢熱線2838 0511，查詢醫療券餘額及相關詳情。

提提大家，查詢醫療券餘額只適用於已核實的醫療券戶口，如果仲未核實的話係查唔到的。至於點樣核實戶口？合資格人士只要響接受醫護服務及使用醫療券時，向已登記嘅醫療服務提供者出示身份證，並響親身接受醫護服務後簽署同意書，就可以使用醫療券。

醫療券詳情：按此