擔心退休後唔適應？拆解退休後4大心理轉變 & 保持心靈健康6大秘訣
面對即將退休，你係開心多，定係憂慮多呢？畢竟係人生第一次退休，要學習嘅事情都唔少，今日就同大家分享下退休後有可能出現嘅心理變化，同埋要點樣應對，等大家做好準備迎接退休生活。
退休後4大心理變化
1. 多疑慮
從職場退下來後，如果暫時無新寄託，好容易會自我懷疑，覺得自己無用，甚至認為別人對自己嘅態度唔同咗，擔心其他人睇唔起自己。
2. 唔鍾意改變
面對全然陌生嘅退休生活難免不知所措，有些人可能因為想增加安全感而拒絕改變，封閉自己唔肯嘗試新事物。
3. 變得冷淡
對生活唔感興趣，做咩都提唔起興趣，甚至認為已經睇透世事，可能會變得愈來愈悲觀。
4. 感到孤獨寂寞
睇見身邊人為工作而忙碌，只得自己咁清閒；仔大女大有自己生活，唔似以前咁需要爸媽；響職場認識嘅朋友，亦不如以前般緊密聯絡……依啲種種都會令退休人士感到寂寞，覺得被冷落，只得自己孤獨面對退休生活。
退休後保持心靈健康6大秘訣
1. 退而不休，培養積極人生態度
退休只係離開職場，但唔代表退出社會，不妨利用自己多年嘅職場經驗同人生智慧繼續貢獻社會。雖然年紀大咗，身體無年輕人咁靈活，但我哋亦有寶貴嘅經驗同閱歷係年青人未有的，大家可以互補不足，推動社會發展。無論係做義工又好、兼職又好，都可以保持同社會嘅聯繫，保持積極向上嘅心態就唔會脫節。
2. 正面看待轉變，培養良好適應能力
退休為生活帶來各種轉變，角色唔同咗、經濟收入可能少咗，年紀漸長身體亦開始出現變化…… 需明白依啲轉變都係正常的，人生每個階段都有佢嘅獨特之處，毋須過份擔憂同抱怨，調整自己嘅心態順應變化。
3. 保持對生活的熱情
生命中仲有好多美好事物等待你去發掘，好多風景優美嘅地方未去過、好多興趣未學過，不妨多出外走走、學一啲從前無機會學嘅事情、多做運動，保持適度忙碌同埋身體機能正常運作，精神同身體都健康，對生活充滿期待，日子自然過得開心。
4. 建立和睦的家庭關係
退休後多咗時間同家人相處，家庭氣氛係咪和諧融洽對個人嘅身心健康有莫大影響，處理好同另一半及仔女嘅關係極為重要，盡量寬厚對待身邊人，多睇他人嘅長處，包容對方嘅缺點，放寬心坦誠待人，令家庭關係和睦。
5. 培養新興趣、認識新朋友
想退休生活更多姿多彩，減低孤獨感同失落感，不妨試試培養唔同興趣，亦可以報讀唔同課程或做義工，響當中有機會認識新朋友，無論係年紀相近嘅退休人士定係年輕人，一定都可以為生活注入新鮮感。
6. 知足常樂
最後一個秘訣就係「隨遇而安，知足常樂」，活咗幾十年應該好明白世事無完美，社會亦唔係處處公平，有時候無法改變大環境，也就只能換個心態，順應天命隨遇而安，不強求不怨恨，知足常樂，內心就會平和健康。