退休前想幫屋企大裝修，有咩要注意？家居4大空間改造貼士

唔少樂齡朋友響準備退休階段都想裝修一下屋企，因為至少仲要住多十幾廿年，考慮到老後生活所需，趁住仲有穩定收入時就進行家居大改造。

裝修屋企 改造成長者友善家居

間屋住了幾十年，牆壁、地板和家居配套都開始老舊，裝修一來可以更換已經損耗的設備，提升生活質素；二來可以將屋企改造成更適合未來需要，例如換上防滑地板或在加裝扶手等等。畢竟退休後比較多時間留響屋企，將屋企翻新一定會住得更舒服。

退休宅空間改造要點

退休人士裝修家居的時候，比起美觀，更需要注意改造後係咪可以提升屋企的安全、便利同舒適程度。以下即教大家屋企4大空間改造貼士！

客飯廳

年紀漸長肌肉流失，容易企唔穩跌親，揀家具時要留意有無鋒利角位，以免跌倒時撞向尖角受傷。另外，最好揀有固定扶手的餐櫈同梳化，方便坐低／起身時有個支撐來借力，而梳化應有有一定承托力，避免過軟。

浴室

浴室係全屋最容易跣倒的空間，可以改用防滑地磚，建議挑選防滑系數達R10標準的。出入浴缸時有跌倒風險，可考慮改用企缸，同埋加裝扶手。如預計日後可能有需要使用輪椅，可將浴室門改為趟門，同埋用無門檻或門檻較低的設計，方便輪椅出入。

廚房

建議在廚房吊櫃增加一些五金配件，例如升降架、拉架，只要輕輕一拉就可以將放響高處的物品拉下，避免擒高擒低增加跌倒機會。

睡房

而家好多人都鍾意造地台床，但對樂齡人士來說，地台床太矮，坐低起身時好費力，亦會增加膝頭壓力。睡床唔可以太矮，但一樣唔可以過高，太高的話落床時雙腳容易重心唔穩，可能會向前跌倒。最理想的床架高度係18至20吋，當坐響床邊時，雙腳應該可以平放地上，膝頭同小腿成90度就最為理想。

相關閱讀：樂齡跌倒手尾長 3招延緩骨質疏鬆防骨折