可扣稅自願性供款5大特點　每年最高6萬扣稅額　 慳錢同時增加退休儲備

「可扣稅自願性供款」(TVC) 係強積金制度下一種新的供款，有別於現行強積金計劃強制由僱主同僱員各供月薪的5%，可扣稅自願性供款係由僱員自行決定係咪供款。

可扣稅自願性供款5大特點

1. 可扣稅

政府響2019年4月1日實施稅務優惠，大家只要有做強積金可扣稅自願性供款，或者購買合資格延期年金，就可以為薪俸稅同個人入息課稅申請扣稅，扣稅額上限係每年6萬元，以而家最高稅率 (17%) 去計，每年最多可以慳$10,200稅。不過留意依筆限額係同合資格延期年金保費扣稅額共用的。

2. 方便簡單

符合資格人士可以自由選擇設有可扣稅自願性供款的強積金計劃，直接向該計劃供款就得，唔使經僱主轉交供款。

相關閱讀：21間提供「可扣稅自願性供款 帳戶」強積金計劃清單 (附開戶時間&供款方法)

3. 靈活供款

唔同強積金每月強制定額供款，TVC 係不定期、不定金額靈活供款，可以因應個人情況隨時增加、減少、停止或重新開始供款。

4. 自主決定

大部分強積金計劃都有提供TVC帳戶，亦設有唔同種類的成份基金以供選擇。供款人可以隨時將全數帳戶結餘轉移到其他強積金計劃的TVC帳戶。

5. 清晰

為方便供款人就可扣稅自願性供款金額填寫報稅表，強積金受託人每年會向供款人提供供款概要。

合資格人士

在強積金計劃中持有供款帳戶 或 個人帳戶 或 獲強積金豁免的職業退休計劃的成員，都合資格作出可扣稅自願性供款。

如果有感強積金的5%供款未能保障退休生活，想趁仲有工作能力時儲多點錢，不妨考慮一下TVC。不過要留意，TVC帳戶入面的結餘，無論有無申請扣稅，都要等到65歲退休時先可以提取 (符合法例訂明的特定情況除外)。考慮到強積金行政費用都唔平，如果將供款用作其他投資，回報率有機會比放入TVC帳戶高。大家可以多加了解，再決定點樣有效運用筆錢，以達至理想的退休生活。