TreasureDo Whatsapp Group

想提早退休?先破除7大常見退休規劃迷思

覺得自己有排都未退休,唔使咁早諗定將來?有調查發現,好多人45歲之後先開始做退休規劃儲蓄,加上低估以後每月開支,令到退休生活不似預期。想精明地計劃未來,首先要破7大錯誤退休規劃迷思。

退休規劃

7大錯誤退休規劃迷思

1. 自己仲後生,有排都未退休,之後先慢慢諗

好多人太遲規劃退休,到45歲之後先開始退休儲蓄,平均只得10至15年去安排。其實退休儲蓄愈早開始愈好,假設30至40歲就開始規劃,而投資報酬率達6%的話,每月唔使5000元,到65歲就可以儲到1000萬。

2. 定期定額儲退休金就OK

調查發現無論男性定女性,有超過一半人只係以存款方式來預備退休金。長期且穩定的定額儲蓄固然係必要,但都可以考慮埋合適的投資組合,並且隨住愈近退休年齡就要調整資產配置。

3. 退休拎強積金同政府資助就夠生活

千祈唔好低估退休生活的費用,以為每個月只需用幾千至一萬蚊,咁樣好易每月儲得太少錢。先評估自己對退休生活的需求,估計所需金額,扣除強積金後,再準備餘下所需的退休金。

4. 退休投資愈保守愈好,最好零風險

退休投資應最好按個人財務狀況同風險承受度而定,選擇唔同風險程度的資產組合,如果一味減少投資風險,可能會令到回報偏低,增加退休金不足的機會。

5. 退休金啱啱夠用就得

準備退休金時要考慮埋未來通脹的風險,同埋自己長壽的可能性,最好多準備一點。

6. 愈早退休歎世界愈好

早退休固然有更多時間歎世界,但同時代表無法再主動賺取收入。應該定期審視個人的退休需求,如果發現退休金預備進度未如理想的話,可能要考慮延後退休。

7. 自己身體好健康,唔使考慮長期照顧服務

千祈唔好忽略長期醫療照顧的問題,如果真係患上需要長期病需要專人照顧,可能不出3到5年就用完退休金,不妨考慮趁早購買老年醫療、長期照顧保險等,多一重保障。

相關閱讀:有幾多錢先可以提早退休?「4%黃金法則」退休金計算