用樂悠咭搭港鐵，60至64歲、65歲優惠有唔同？依個年齡先可特惠價搭東鐵線頭等？

「點解大家都係用樂悠咭搭港鐵，65歲或以上可以用特惠價搭東鐵線去羅湖／落馬洲站，坐頭等仲有得平？但60至64歲就無優惠要畀成人價錢？點解點解？」

根據港鐵官網嘅「政府長者及合資格殘疾人士公共交通票價優惠計劃」車費表，60至64歲人士以樂悠咭、65歲或以上人士以長者八達通或個人八達通 (包括樂悠咭) 使用港鐵本地服務，包括港鐵、輕鐵、港鐵巴士 (新界西北) 及港鐵接駁巴士，每程只需$2。

不過2元優惠計劃唔適用於機場快線、往返羅湖、落馬洲及馬場站嘅東鐵線服務、東鐵線頭等服務。60至64歲人士如果使用以上服務，需付成人八達通車費；而對65歲或以上人士來說，除咗機場快線需繳付成人八達通車費外，乘搭東鐵線往返羅湖／落馬洲站或坐東鐵線頭等，都可享有特惠價。

60至64歲、65歲票價有唔同

以下就舉兩個例子說明60至64歲、65歲或以上人士響往返羅湖、落馬洲站，同埋搭東鐵線頭等嘅票價上有咩分別。

1. 北角＞羅湖 / 落馬洲站

60-64歲：$51.8/程 (等同成人八達通車費)

65歲或以上：$25.8/程

2. 大埔墟＞九龍塘 (東鐵線頭等車廂)

乘客需支付額外費方可享用東鐵線頭等車廂服務，60至64歲人士嘅額外費相等於該程東鐵線車程普通等正價成人車費；而65歲或以上人士嘅額外費會比較便宜。

60-64歲：$2＋額外費$9.3＝$11.3

65歲或以上：$2＋額外費$4.7＝$6.7