過年大掃除！舊物回收賺「綠綠賞」積分換禮品 (文末有新年獎賞優惠)
過年大掃除總會清到一堆唔要的物品出來，但有些物品相當新淨，就咁丟掉好可惜，不如拎去環保署的指定回收點回收，用舊物賺取「綠綠賞」積分，之後仲可以換生活用品食品添！
首次登記「綠綠賞」 記住帶夠2公斤回收物
第一次去回收，記得要帶夠至少2公斤回收物，先可以登記領取「綠綠賞」智能積分卡，第時再回收時，積分就會儲落張卡度，方便日後換禮品。
點樣知道回收物換到幾分？
職員會將回收物分類磅重，再根據物品的類別同重量去計積分，大家只需要出示綠綠賞積分卡或印於積分卡面背後的QR Code，積分就會立即儲入卡裡面。積分卡係可以共用的，建議一家人用同一張卡去儲分，就可以快點換到禮物。
8大類回收物品
大家只要拎以下8種回收物去指定回收點，就可以賺取積分。一般來說，每公斤回收物可換10分積分，但有些回收物 (例如塑膠、玻璃樽)可以換取更高積分。
可以拎去邊度回收？
全港18區都有回收點，按此查看各區「回收環保站」、「回收便利點」及「回收流動點」
有咩禮品可以換&點樣換？
唔同積分可以換到唔同禮物，多數都係實用的日用品，好似如麵、米、油、調味料或者其他環保用品。
當儲分儲到咁上下，帶埋張實體綠綠賞積分卡去回收點，同職員講想換咩禮物就得。
回收便利點新年獎賞 6倍積分6折優惠
綠綠賞今個新年仲推出特別推廣活動，分成兩個階段超多優惠，不過留意返活動只適用於「回收便利點」 (門市限定)，千祈唔好去錯地方呀！
階段一：累積6️倍積分 (2022年1月6日至26日)
「綠綠賞」會員在1月6號至26號拎以上8類回收物去「回收便利點」，即可獲得6倍積分。在1月6號、16號同26號當日，仲可以用6分「綠綠賞」積分換大嘥鬼或者慳BB襟章1個，每日最多換領2個。
階段二：6️折兌換禮品 (2022年2月6日至26日)
2月6號至26號期間，「綠綠賞」會員只要出示正本會員卡，即可用6折積分換領禮品。
相關閱讀：新年內心大掃除 放下執著 迎接美好新事物