【2元乘車優惠】車費唔足 $2 都會收 $2？可以搭頭等車廂？解答大家對乘車優惠的最大疑問！
用樂悠咭或長者八達通搭乘大部份交通工具時，都可以享有2元乘車優惠，不過唔少朋友都有個疑問：「如果車費唔足 2 元，係咪會收 2 元？咁咪仲貴咗？」
以電車為例，即使加價後，長者 (65歲或以上) 的車費都係 $1.3，而港鐵某些車站往返的車費亦不足 $2，例如紅磡同旺角東、大圍同沙田、上水同粉嶺等等，長者 (65歲或以上)特惠票價係 $1.4，正價票價比2元乘車優惠仲要平，咁會唔會反而被收多咗錢？
答案係唔會的！根據運輸署網頁：「若原來票價已低於 2 元，受惠人士只需支付該原來票價。」簡單來說，就係只會收取比較平的那個價錢，如果原票價平過 $2，就會收取原票價；如果原票價貴過 $2，就會收取 $2。
不過提提大家，以上舉例的長者票價只適用於 65 歲或以上人士，60 至 64 歲持樂悠咭人士的車費仍然係 $2。
另外亦有人問：「可唔可以用2元乘車優惠來搭東鐵線頭等車廂呢？」根據運輸署網頁，2元乘車優惠唔適用於東鐵線頭等車廂，乘客除需支付 $2 車費外，另須支付頭等額外費，額外費相等於該程東鐵綫車程的原有車費。除咗東鐵線頭等車廂外，2元乘車優惠亦唔適用於機場快線、往返羅湖、落馬洲同馬場站，機場巴士「A」線同「NA」線、馬場路線、長途巴士新型服務，同埋渡輪的豪華位。