新女團COLLAR成軍!原來60、70年代香港都有女團?
近期城中熱話非新女團COLLAR正式出道莫屬!依股女團風潮唔知會流行幾耐呢?大家仲記唔記得早響60、70年代,香港都曾經有幾隊好出名的女子組合?
COLLAR係由ViuTV推出的8人女子組合,全部成員都係透過選秀節目《全民造星IV》挑選出來。COLLAR第一首出道歌《Call My Name》引來極多關注,成軍一天討論度十足。今日有新女團COLLAR闖出名堂,大家又記唔記得幾十年前香港都有「女團」?不過以前年代就無咁多個成員,而且唔係以跳舞為主,通常都係專注歌唱表演,以下就講返3個當年最多人認識的女子組合。
Blue Star Sisters
活躍於60至70年代,5個成員係親姊妹,平均年齡只得16歲。全女子組合當年響香港好少見,Blue Star Sisters以唱英文歌為主,五姊妹一手包辦樂器同唱歌,曾經紅極一時,唔單此響香港出名,仲紅到成日出埠登台,新加坡、馬來西亞、泰國都有她們的影蹤,最遠更試過去德國宣傳唱片。
5姊妹響70年代已經移居泰國,不過響Youtube上仲可以搵到她們的現場表演,想懷緬過去的話不妨去重溫一下!
筷子姊妹花 (The Chopsticks)
筷子姊妹花只有2位成員:仙杜拉同阿美娜,雖然叫「姊妹花」,但其實兩個人並無血緣關係。依隊二人組合主力係唱英文經典歌曲,由於歌聲甜美,加上前衛的衣著、搶眼的高髮髻造型,好快就廣受歡迎。1970年,無線電視幫她們製作一系列的〈筷子之歌〉,令二人紅極一時。
不過,筷子姊妹花響1974年突然拆夥,之後二人再無一齊響公開場合出現。阿美娜後來移居加拿大,有傳她做了修女,也有傳她響90年代已經因車禍去世,但無法證實消息真偽。而仙杜拉響拆夥後事業更上一層樓,唱出多首經典作品,好似《兩個就夠曬數》、《啼笑姻緣》等,她在1994年移居加拿大,現時只有演出邀約先會返港。
The Samson Sisters Trio
由Samson 三姊妹:Christine Samson (洛詩婷)、Vikki Samson同Lizzie Samson組成。大家對Christine Samson應該唔陌生,早響60年代她已經同兄弟姐妹組成家族樂隊D’Topnotes,Christine同時身兼主唱、低音結他手同鍵琴手。後來D’Topnotes輾轉幾次拆夥再組隊,到80年代就由三姊妹合組The Samson Sisters Trio。
Christine而家響香港開音樂學校,教授聲學,她和Vikki都有在校任教。而Christine的學生更加係粒粒巨星,包括容祖兒、謝安琪、楊千嬅、G.E.M.等等。