真係有智者事竟成：少年犯脫變成醫生

[eden小五]

16歲少年犯，因為醉酒撞毀偷返嚟嘅車入獄，之後四年不停因為黑幫同暴力問題出入監獄。二十年後竟然就快成為醫生，而令人生軌跡改變嘅轉捩點，竟然係獄警沒收咗佢部電視機。

37歲嘅Steven Beattie响蘇格蘭Glasgow成長，細個嘅環境相當艱難，爸爸患有柏金遜症，媽媽有精神疾病同癌症，後來更因為癌症離世。因為咁，佢由細已經要照顧有長期病患嘅父母，有時照顧到凌晨三點，第二朝根本返唔到學。

所以15歲就輟學，之後加入黑幫，開始打交、飲酒、偷車，16歲第一次被送入Polmont少年犯監獄。Polmont曾經被形容為蘇格蘭最暴力嘅監獄，但Steven第一次入去，發現原來冇想像中咁可怕，仲識到唔少朋友（損友）。

結果坐監對佢漸漸失去阻嚇作用，之後幾年繼續出入監獄。直到有一次，佢因為响監獄打交被罰，每日要鎖响單人囚室23個鐘，連電視機都被沒收。

不過咁樣就改變咗佢嘅人生...

佢話以前從來冇時間坐低認真諗自己嘅人生，直到電視都冇埋，終於有機會問自己如果繼續咁樣落去，五年後自己會變成點？唔鍾意嗰個想象到嘅結果，就必須改變。於是佢寫低三個目標：離開Glasgow、戒酒、遠離嗰班損友。

出獄之後，佢知道自己有案底，未必有僱主會相信佢，於是自己開健身訓練生意，仲成為一名MMA格鬥選手，花名叫"Doctor Beatdown'。佢就係咁樣努力賺錢，儲夠錢就搬離Glasgow，但佢仲有個更大嘅夢想：做醫生！

原因係當年照顧爸爸期間，爸爸嘅神經科醫生留意到Steven其實對柏金遜症非常了解，令佢開始對行醫產生興趣。不過15歲輟學，成績根本唔夠資格入醫學院。佢就由學院銜接課程重新開始，再入University of Glasgow讀生理學，最後成功考入University of Dundee醫學院。
下年六月，佢就會正式畢業成為初級醫生，由佢輟學開始，足足廿二年。由「我要重新做人」，真係寫低計劃，再用十幾二十年時間，一步一步去完成。

"I wrote out a plan and I stuck to it."

十幾廿歲重新做人，戒壞習慣，遠離損友已經好難，然後用十幾廿年賺錢同時讀書，讀到醫科，中間要有幾多堅持？有時人生最難嘅，唔係決定要改變，而係決定之後，每一日都堅持繼續做落去。
佢爸爸媽媽應該好安慰



https://www.patreon.com/goodbyehkhellou ... /174707089


好勵志既故事，有智者事竟成，希望啲年青人都識下定目標，好好地規劃人生，自目標衝﹗