好心婆婆為抱住小朋友嘅媽媽遮雨

[Oncidium]

呢個係朋友嘅經歷。

早一段時間，朋友抱住瞓咗嘅兩歲小朋友去搭巴士，點知忽然落雨。佢把遮放喺背囊，但抱住小朋友唔方便攞出嚟，於是喺巴士站附近嘅騎樓底等巴士，諗住唔係好大雨，又只係十幾步路程，巴士一到就快步上車。

等到巴士到站，朋友正要快步行時，有位婆婆行去佢隔離攞住把遮幫佢遮雨。朋友即時表示感激，覺得婆婆順路遮埋佢實在非常好心。當佢上咗巴士先發現婆婆唔係要搭巴士，而係專程走過嚟遮佢上車，因為佢喺車上睇到婆婆係向另一方向行，一啲都唔順路。

朋友話非常感激呢位婆婆嘅幫忙，希望婆婆身體健康，生活幸福！

[soso]

好心會有好報

[eden小五]

婆婆真係好好心地。

[去去無氣走]

好人好報

[AvadaBanana]

真係令人窩心！

看似微不足道，卻正正幫到當時人當刻所需！

[橘色虎斑貓]

幫助別人無分年齡，亦唔一定要付出好多，最重要係有心及主動。
婆婆有細心留意，加上有愛心及願意主動付出，適時伸出援手幫助有需要嘅人。

祝婆婆好心有好報！

[SlamDunk]