應該點開口叫新抱幫手做家務好？(幫朋友問)

[Siufu]

朋友M個仔啱啱結婚半年，新抱搬咗入佢屋企。一開始相處都無問題，多咗個人熱鬧咗都幾開心。但點知，阿新抱真係一啲家務都唔做！

M同我講，新抱每朝都會沖涼，搞到地下濕晒又唔抹就趕住返工。廚房煮完嘢就亂晒籠，碗筷堆喺度唔洗。見到垃圾桶滿咗唔幫手倒，夾硬塞垃圾落去，垃圾桶蓋都合唔實好臭！

M話佢試過暗示新抱幫手做嘢，但係對方應完就算，成日話自己返工攰。咁M都要返工嘅，仲要煮飯洗衫，樣樣都要自己做。最慘係阿仔乜都睇唔到，仲話新抱啱啱嫁過嚟，唔好咁快逼人。但係都半年啦喎，唔通要等幾耐先至可以要求佢做啲嘢呀？

M而家真係好頭痛, 唔想同個仔嘈，又唔想成日同新抱鬥氣, 但係咁樣落去實在太辛苦啦。各位有咩好主意？應該點同新抱溝通？定係直接同個仔講？定係乾脆叫佢哋夾份請個鐘點外 (工人就唔使諗，屋企無地方) ？真係唔知點算好...

[Boris Lee]

都結咗婚半年，再唔講就真係越嚟越難講。
我建議你M與新抱私下溝通，表達自己的感受和需求。如「我覺得家務分工的情況讓我有點不安，因為我都有唔少工作要做，希望可以得到你的幫助」等，避免責怪對方。了解彼此的想法和困難，找到共同的解決方案。

不要一味要求新抱必須負責所有家務。可以商量分工方式,例如新抱負責某些固定的家務，M負責其他。漸進式地調整，給彼此適應嘅時間。

不過當然要接受對方拒絕或應承咗之後唔做，唔好好manage下自己期望，好容易激親。
 

[soso]

直接同個仔講啦

[開心一夢]

食飯時同阿仔新抱一齊講，兩老負責買餸煮飯，吸塵，兩後生負責洗碗去，倒垃圾，阿仔要做由得佢。唔做嘅，話煮唔到咁多，自己出街食先。執屋嘅，佢地嘅房佢地執，廳嘅垃圾唔肯執嘅，即時開聲。你怕佢地反面，佢地都怕啫。

[hhyau]

我朋友以前同老爺，奶奶，姑仔，一齊住。奶奶煮飯，要佢洗碗，姑仔成日帶朋友回家“痴”餐，食完飯就坐低睇電視。於是，我朋友晚晚放工就返外家食飯，（外家有菲傭）咁，佢奶奶自己洗碗囉！