錦田鄉酬恩演戲暨美食嘉年華一日遊

[eden小五]

終於等到啦！今日 (17/1) 係錦田鄉難得一遇嘅「十年一屆酬恩建醮」的大日子！除咗傳統儀式，今日仲有重頭戲「獅王爭霸戰」同埋美食嘉年華，諗起都覺得場面一定超級熱鬧！

我哋朝早 10:30 喺大圍火車站出發，搭屯馬線直達錦上路站。出發前我原本做足功課，Google 晒步行路線圖，點知去到現場發現根本多此一舉，因為一出 B 出口，已經見到人山人海！原來大家都係向住同一個目標進發，地圖都唔駛睇，只要跟住人潮或旗海行就一定無錯！全程行左差不多30分鐘，不過我地邊行邊講，一啲都唔覺辛苦，只不過，今日有啲熱同曬，我地只戴左太陽鏡，但無帶遮，曬紅了。











 

[eden小五]

一到會場，已經係中午 12 點零幾分，獅王爭霸戰已經熱烈開打！現場氣氛簡直爆燈！
 
只見幾隊獅隊健兒全情投入、互相較量，時而飛身躍上高樁，時而靈巧低舞穿梭，動作俐落又精彩，完全展現出舞獅嘅力與美！觀眾睇得如癡如醉，場內不時傳出一陣又一陣掌聲同喝彩，有啲人甚至忍唔住舉機錄影，全程捕捉每個高潮位！


 

[eden小五]

獅王爭霸戰會由中午 12 點打到黃昏 6 點，場面雖然精彩，但由於時間太耐，加上我哋睇到 1 點幾，肚仔已經開始打鼓，於是決定走出棚外，轉戰另一個戰場 —— 美食嘉年華會！
 
可能時間尚早，當時有啲攤檔啱啱開檔，仲忙緊煮食預備，但有啲已經「開波」，檔主們紛紛高聲叫喊，熱情招呼途人。現場真係超級熱鬧，人聲鼎沸，美食氣味撲鼻，一檔有一檔吸引，琳瑯滿目的選擇睇到我哋眼都花埋，但個肚就表達得十分清楚 —— 要食！





我哋第一時間試咗 $60／5隻的燒蠔


然後係$40／5隻的海膽蟹粉小籠包


最後，一定要講推介：泰國攤檔 $50／4串 串燒，真係 CP 值超高、又香又入味！特別係豬扒、豬頸肉同雞肉，醬汁十分惹味，我哋一致認為係全場最好味美食之一，推爆！

[eden小五]

食飽飽之後，當然要繼續四圍 explore 一下～

行過去打醮主棚附近嘅大牌坊區，忽然發現當中的紙偶公仔超可愛！
呢啲紙偶公仔設計得好有心思，每隻都隨住陣風吹嚟輕輕搖晃，動作似模似樣，簡直栩栩如生！
 
最吸引我哋注意嘅有三組：《西遊記》、《八仙賀壽》及《三英戰呂布》
 
呢啲紙偶唔止有藝術感，仲帶出好多中華文化智慧同經典故事元素，影相打卡一流！

[hhyau]

節目好豐富喎。多謝分享靚相美食！

[去去無氣走]

十年一次好難得真係值得一去

[tiramisu]

多謝分享好熱鬧！60蚊5隻蒜蓉燒蠔，又唔算貴喎

[Oncidium]

多謝分享！
睇咗樓主介紹先去，真係好值得睇！

[橘色虎斑貓]

好彩我都有去睇，真係值得睇，冇睇嘅就要等十年喇。
泰國佬串燒真係幾好食，多謝樓主介紹！