老人家買洗衣機，被呃買埋超多洗衣珠，可用8年﹗

[eden小五]

大型連鎖電器舖嘅推銷手法又再惹起爭議。有網民喺社交平台Threads發文投訴，話早兩個月屋企長者去港島區一間「橙色大型電器連鎖店」買洗衣機，部機原本都係三千幾蚊，點知埋單竟然畀班Sales游說，買咗成四千蚊、合共5600粒洗衣球返屋企，搞到成屋都係一箱箱貨，事主火滾直斥店員根本係蝦老人家唔識計數。

事主透露，返到屋企問番長者點解無啦啦買咁多，長者就話個Sales係咁氹佢話好抵、好快就用得晒。事主計完數即刻扯火，指出就算每日用兩粒洗衣球，5600粒足足可以用成8年；而呢批洗衣球嘅保質期只係去到2030年，即係要喺過期前用晒，每次洗衫咪要用成十粒先搞得掂。事主不滿批評而家啲Sales到底係賣電器定賣洗衣球，直言真係好想去退貨，仲話已經將呢間舖頭列入黑名單。

帖文一出隨即引嚟大批網民熱議，唔少人都鬧爆個別Sales為咗佣金咩都做得出，針對老人家判斷力弱就瘋狂硬銷。大型連鎖電器店豐澤嘅官方帳號火速喺帖文留言現身，主動問事主可唔可以提供聯絡資料同埋單據編號，方便作進一步跟進。網民質疑係咪前線一早已經有呢種銷售常態。

消委會過去亦多次提醒市民，如果商戶向長者或弱勢社群推銷遠超正常使用量嘅貨品，做法相當值得商榷。根據香港法例第362章《商品說明條例》，商戶如果用騷擾、施加不當影響，或者特登隱瞞重要資訊去促成交易，好可能會觸犯不良營商手法。消委會呼籲為人子女要多啲留意長者嘅日常消費情況，一旦遇到類似爭議，記得保留單據同紀錄，向商戶交涉或者向消委會同海關投訴。 


做生意做得咁唔老實，氹老人家買至少可用8年既洗衣珠，仲未計8年內洗衣珠會過期，而且有可能會溶解，咁即係叫老人家百百花錢喇﹗呢種行為，分明係欺騙老人﹗

[煮君的太陽]

 老人家真係唔好咁耳仔軟呀，咁好易被人有機可乘架﹗

[Oncidium]

有啲長者真係好容易受人影響，只要覺得對方好人就會特別易信，再加上有人話好用、好抵之類嘅說話，就會跟住買，完全忽略用唔用到，結果就俾人呃。