小食店老闆哮喘突發作 熱心食客四出撲藥救人

[eden小五]

 長沙灣一間宵夜小食店日前老闆哮喘突然發作，卻遍尋不獲氣管藥，情況危急。當時多名正在等候外賣的食客見狀即時出手相助，有人開電筒幫忙尋藥，有人摸黑衝往附近藥房撲藥，最終靠一名熟客5分鐘內買藥送到，老闆及時吸藥脫險。店員事後在Threads發文感動，直呼「香港人其實真係冇得頂」！


好人好事丨哮喘突襲 老闆僅「透到半啖氣」據該小食店店員在Threads發文憶述，事發於前晚約10時，店外有三四組客人排隊等外賣。老闆平時會將哮喘吸入劑放在枱頭，當晚卻突然向店員表示「就快講唔到嘢」，原來是哮喘發作，枱頭和車上都找不到藥，老闆返回廚房時已經「淨係唞到半啖氣」。
 
女店員見情況危急，得悉老闆情況後即時停手找藥。但因為門口仍有客人，不敢驚動他們，怕對方等太耐而不敢完全停手。期間，一名細心的男食客發現不妥，主動詢問店員發生何事，並開電筒幫手找藥。當他得知原來是老闆哮喘發作後，毫不猶豫說「我去幫你搵！」。另一名女客人亦自告奮勇走去撲藥。在旁等候的食客亦相繼幫忙打電話：

佢：我有冇嘢幫到你？
我：老闆哮喘，搵唔到支藥
佢：邊度有得買
我：要藥房，但而家都閂晒
佢：七仔會唔會有？
我：七仔冇，有藥房嘅萬寧都有機，但應該閂咗
佢：我去幫你搵！
然後一位女客人都開聲話去搵， 兩個急急腳走咗去， 淨低嘅一對情侶男生都跑過嚟話去搵， 女仔就留喺原地打電話問朋友有冇。

熟客飛奔送藥 大汗淋漓衝入廚房女店員突然想起一名住附近、曾經提及有哮喘的熟客，致電求助時對方正身處深水埗，但二話不說即時去幫手找藥。當時情況危急，女店員坦言如果當時再找不到藥的話，已經打算關店送老闆入醫院。
5分鐘後，該熟客致電店員說「買到啦，而家攞過嚟」，更說「頂住！我而家跑返嚟！」。該名熟客大汗淋漓拿着藥衝入廚房，其他出外撲藥的食客亦差不多時間折返，見到老闆成功吸藥，情況穩定下來後，大家都相視而笑。
 

你 哋 係 咪 傻 㗎 ！ 我要請你哋食一百隻雞翼！ 第一位男仔急住出餐都冇送嘢食畀你； 送藥嘅女生我急到淨係畀咗錢你； 見字麻煩嚟領取一百隻雞翼。
我真係感動到特登開返個threads嚟紀錄

 好人好事丨店員感動承諾「100隻雞翼」報恩店員事後感動表示，當晚雖然正值繁忙時段，但無人抱怨出餐慢，反而齊心救人。她在帖文中逐一感謝出手相助的食客：「第一位男仔急住出餐都冇送嘢食畀你；送藥嘅女生我急到淨係畀咗錢你；見字麻煩嚟領取一百隻雞翼。」

 
帖文獲大量網民讚好，有人說「香港人雖然被形容有距離感，但遇到他人有需要，都會相當熱心上前幫忙解困」。亦有網民提醒老闆「買多幾枝放唔同位置啦，最好袋住喺隨身衫/褲」。

https://topick.hket.com/article/4185698/


香港仍然有愛。

[Oncidium]

呢個真係香港人嘅暖心一面，個個都咁肯幫手，睇到都覺得好窩心。

[MorningTea]

今朝飲茶聽到街坊講起呢單，個心即刻暖咗。街坊就係咁，唔使識，一有事就出手。希望老闆早日康復，保重身體呀。

[UncleBen]

Wow, hats off to嗰班食客！哮喘發作真係分秒必爭，嗰位熟客由深水埗飛奔買藥送到，大汗淋漓衝入廚房，呢啲就係real Hong Kong spirit。店員話要請一百隻雞翼，抵佢哋食啦，warm到爆！

[樂齡遠足隊]

5分鐘由深水埗跑返嚟買藥，呢個熟客真係冇得頂。有哮喘真係要隨身帶定藥，病發嗰幾分鐘生死攸關。店員話請食客食一百隻雞翼，夠義氣，老闆都要好好保重身體。

[去去無氣走]

熟客真係好好心

祝老闆保重身體

[UnclePaul]

哮喘發作嗰幾分鐘真係等唔起，班食客唔係企喺度睇，係即刻分頭去搵藥，呢啲反應救咗人一命。老闆之後真係要袋定支藥喺身，枱頭、車入面都要放多支，唔好再靠彩數。